【精華】U21歐國盃A組三隊同分唔同命:西班牙怒炒波蘭首名出線,意大利挫比國仍勢危

睇足365 於 23/06/2019 發表 收藏文章
U21歐洲國家盃分組賽已經進入尾聲,A組就喺噚晚率先完成最後一輪賽事,其餘兩組亦會於今晚及明晚深夜陸續完成。西班牙U21成功喺噚晚以五球大破波蘭U21,以首名出線。由於賽制關係,小組次名嘅意大利能否出線,就要睇埋其餘兩組戰果。

U21歐洲國家盃分成三組,每組各四隊,分組賽直接決出四強,因此三支小組首名出線,再加上一支最佳次名可以晉身四強。


西班牙U21 5-0 波蘭U21


西班牙U21派出皇家馬德里中場施巴路斯、拿玻里中場法比安雷斯等,多名已於五大聯賽獲得穩定上陣機會嘅球員上陣,開賽17分鐘就由剛加盟韋斯咸嘅柏保路科奴斯先開紀錄。奧耶沙巴爾隨後接應施巴路斯妙傳,窄位射成2-0。39分鐘,法比安雷斯禁區外遠射擦柱彎入成3-0。71分鐘,施巴路斯射入罰球世界波。由皇馬外借到利雲特嘅馬約萊爾於90分鐘,射入第5球。


精華片段

比利時U21 1-3 意大利U21


比利時U21於賽前已輸兩場,因此喺呢個「苛刻」嘅賽制中,出線已基本無望。意大利U21就擁有「小基艾沙」費達歷高基艾沙、古度尼、羅倫素柏歷堅尼、尼高路巴列拿等已成名意甲球員。44分鐘,尼高路巴列拿勁射先開紀錄。換邊後,古度尼頭槌批入成2-0。比利時於79分鐘由禾沙治亞倫射入靚遠射追回一球,但尼高路巴列拿完場前為意國埋齋射成3-1。
精華片段

A組完成全部三輪分組賽後,西班牙、意大利及波蘭同樣錄得2勝1和,同得6分。西班牙僅僅以1個得失球優勢鎖定首名出線,今仗大炒5球,入少一球都唔同玩法。反觀意大利就僅以1個得失球之差只得次名,需要同其他兩組次名計算出最佳次名先可以出線。


不過,由於C組嘅法國及羅馬尼亞於今輪賽前已經有6分在手,兩隊將於今輪對碰,只要雙方握手言和,法國就會成為一支7分嘅最佳次名球隊,攜手出線。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→