簡迪「壞孩子」一面終被發現,奧度爾、「龍虎切」異口同聲指隊內被罰款最多竟然係佢

睇足365 於 05/03/2019 發表 收藏文章
車路士中場尼高路簡迪絕對現今球壇最出名嘅「小毒毒」,佢即使協助法國國家隊捧起世界盃,仍然保持低調,甚至唔敢問隊友借個盃去影相。球場內,簡迪亦勤勉內儉,不僅無處不在,覆蓋範圍極大,身為掃蕩型中場嘅佢亦竟然係公認嘅「君子」,從來唔會俾人話茅,實在難得。球場外,簡迪笑臉迎人,更冇任何花邊新聞,無可挑剔。不過根據兩位隊友透露,簡迪竟然係車路士隊內被罰款最多之人!


簡迪喺場外最經典嘅事,莫過於佢有一次同車路士小將赫臣奧度爾 (Callum Hudson-Odoi) 打機,喺《FIFA》 內大戰N個回合,年輕人打機多數都勁少少,簡迪果然連輸幾場,第四場更加半場被大炒四球,連簡迪都憤然熄機走場,但最估唔到嘅係簡迪喺熄機走場時仍然露出招牌笑容,簡直不可思議。


大家一定估唔到原來「好好先生」簡迪都有曳嘅一面。最近,車路士兩位年輕球員赫臣奧度爾同「龍虎切」路夫斯卓克 (Ruben Loftus-Cheek) 接受《Sky Sports》旗下節目《SoccerAM》嘅訪問,被問到一啲關於隊友嘅問題,例如邊個隊友最似會做領隊、邊個隊友最搞笑、邊個隊友fashion sense最差等等,都唔係唔重點,重點係邊個隊友被罰款最多。唔少職業球隊都有隊內罰款制度,對唔守紀律嘅球員小懲大戒,例如有球隊會罰喺食飯時候拎手提電話出嚟嘅球員,不過紀律問題似乎同簡迪拉唔上關係。

赫臣奧度爾同「龍虎切」嘅答案,偏偏就係簡迪,而兩位爆料者都明白呢個係好難令人相信嘅事實,所以更加強調:「冇錯,係 N'Golo (簡迪名) ,你唔會估到。佢永遠都遲到,係永遠!」


原來簡迪因為喺練波時遲到而被罰款,原來領有會計師執照嘅佢喺時間方面「數口」一啲都唔精。「龍虎切」進一步解釋指:「佢又唔係遲大到嘅,但我哋通常會預早少少去到,佢就通常都會遲一兩分鐘,或者最多啱啱好囉。佢會走入嚟,然後露出招牌笑容,大家就會心諗『好啦原諒你啦』。」果然,簡迪係識得利用佢可愛嘅笑容去「融化」隊友,絕對有理由懷疑佢係有機心嘅!


Source: Sportbible

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→