【笑死冇命賠】史上最靚假動作！緬恩斯門將「鬼之傳球」：「我以為12碼點係個波」

有時候，要呃到人，首先要呃到自己。如果連你自己都唔知想點，對手就好難捉到你路。緬恩斯門將辛特拿 (Robin Zentner) 個姓同「Lord賓」賓特拿 (Nicklas Bendtner) 差少少，但都自創咗一個絕技，叫做「鬼之傳球」。


喺香港時間11月4日22:30嘅德甲第11輪賽事，慕遜加柏喺主場迎戰緬恩斯，開波19分鐘，緬恩斯由艾度迪亞路先開紀錄，領先1-0。去到比賽嘅30分鐘，經典一幕出現。

當時緬恩斯嘅門將辛特拿接到隊友回傳，諗住控定，慢慢睇清楚再交返出去。點知佢控完之後，個波一路喺佢腳邊向後溜，而辛特拿就極之淡定，正如足球教練所教咁樣「唔好耷低頭踢波」，繼續觀察場上隊友嘅位置，然後傳波，佢做得非常之好。咦？個波呢喂？喺你後面呀！



超級好彩嘅係，當時位置唔係好貼龍門，個波冇直接溜入龍，而對手都未逼到埋嚟，所以當辛特拿發現個波喺後面嗰陣仲夠時間得住個位護住個波，先冇派膠失波炸。

慕遜加柏啲social media公關一向好識玩，之前就試過話自己球隊條防線唔見咗，搞笑到球迷都嬲唔落，今次當然唔會放過對手嘅門將辛特拿，半場已經出post玩佢。


最終呢場比賽，慕遜加柏喺67分鐘由維斯達加特追平，踢成1-1完場。之後，主角辛特拿解釋當時點解會傳出「鬼之傳球」：

「個波傳過嚟嗰陣有少少西。我眼角睄到有一點白色嘢，就以為係個波。」

「但原來嗰個係12碼點，而個波已經碌走咗。」

佢喺下面呢條片度親口解釋嘅，而睇返呢個角度，佢由真係踢中12碼點個位喎！

https://youtu.be/2e9kA8DjEhg
Source: SportBible、TheSun、101greatgoals