禾確特倒戈入波照慶祝 惜互射12碼宴客不敵聖人功過相抵

睇足365 於 03/10/2018 發表 收藏文章
星期二深夜除咗有萬眾矚目嘅歐聯分組賽大戰連場之外,亦有一場英格蘭聯賽盃第三圈獨腳戲,以勢均力敵為標準,呢場戲碼都唔弱,係由愛華頓主場迎戰修咸頓。


兩軍今仗半輪換出擊,其中修咸頓陣中主力較多,丹尼恩斯 (Danny Ings) 、列蒙 (Nathan Redmond) 、利文拿 (Mario Lemina) 、靴爾保 (Pierre-Emile Højbjerg) 等悉數正選上陣,但門將位置上起用22歲英格蘭門將安格斯根恩 (Angus Gunn)。愛華頓方面,派出杜辛 (Cenk Tosun)、湯戴維斯 (Tom Davies) 、蘇馬 (Kurt Zouma)、米高堅尼 (Michael Keane)、班納特 (Bernard) 等,另有小將盧卡文 (Ademola Lookman) 、莊祖堅尼 (Jonjoe Kenny) 及杜維爾 (Kieran Dowell) 正選上陣。


上半場44分鐘,修咸頓前鋒丹尼恩斯與列蒙邊路配合,後者突破橫傳,丹尼恩斯無人看管下輕鬆射遠柱得手,為「聖人」先開紀錄。

戰至85分鐘,愛華頓由奧馬尼亞斯 (Oumar Niasse) 送出直線,禾確特 (Theo Walcott) 單刀扳平1-1。


禾確特11歲至17歲曾經效力修咸頓,其後獲阿仙奴相中,早前佢接受訪問時已經解釋過,即使面對效力長達12年嘅阿仙奴,入波仍然會選擇慶祝,因為咁做係為咗尊重新球會嘅球迷同隊友,相舊東家球迷會諒解。果然,面對「母會」修咸頓射入扳平一球,禾確特一樣慶祝。

可惜,「禾仔」未能成為球隊嘅英雄,因為喺互射12碼階段,雙方先各有李察利臣 (Richarlison) 及泰格特 (Matt Targett) 射失,到第五輪,操刀嘅「禾仔」同樣宴客,而修咸頓就由薛迪索拉斯 (Cédric Soares) 射入奠勝一球,令「拖肥」以互射12碼比數3-4出局。修咸頓喺英格蘭聯賽盃第四圈將會面對李斯特城。


全場精華

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→