矛頭直指高普!蘇斯克查不滿難獲12碼:我哋都係想拎返應得嘅嘢啫~

睇足365 於 25/09/2021 發表 收藏文章
老實講,幾乎每一個教練領隊、球員、球迷都總會試過覺得球證對自己隊波唔公平。英超一對冤家曼聯同利物浦,佢哋嘅領隊蘇斯克查同高普,喺開季嗰陣就試過不約而同炮轟球證執法尺度寬鬆,變相鼓勵對手粗野當攔截,似乎只有喺抱怨球證嘅時候,佢哋先可以同聲同氣。最近,同樣因為球證執法問題,佢哋又返到對立面。


曼聯最近喺聯賽面對韋斯咸,紅魔靠住連加特喺89分鐘反超,加上95分鐘盧保12碼宴客,作客以2-1取勝,過程相當驚險,蘇斯克查就認為,曼聯本應獲得兩個12碼而球證艾堅遜未有判罰。

loading


蘇斯克查喺周末賽前記者會中提到,佢認為曼聯今季多次未有得到12碼判罰,係因為有其他領隊公開投訴曼聯過去獲得優待,呢一點佢顯然唔會同意。

「我哋只係想拎到我哋應得嘅嘢。

近兩場比賽,我哋本應獲得3個12碼。不過自從上季某位領隊不滿我哋獲得12碼之後,似乎我哋變得更難得到12碼。

喺呢樣嘢之後,我覺得好大分別。不過我哋只能夠交俾球證去決定,希望佢哋好快會做返正確嘅決定。」

loading


原來蘇斯克查口中嘅「某位領隊」,就係利物浦主帥高普。喺今年1月,高普表示:「曼聯過去兩年獲得嘅12碼,比我過去5年半嘅仲要多。」曼聯喺上一季合共取得11個12碼,係英超第2多,而第1位係李斯特城。

的而且確,如果犯規真係出現而判罰12碼,冇理由怪罪獲得12碼嘅一隊勝之不武。另一方面,英超球證執法尺度不一及難以捉摸,已經係人所共知,喺現今VAR年代之下更加係表露無遺、責無旁貸,呢個問題相信每一隊都曾經受害,各隊應該將矛頭直指問題根源。

Source: Sky Sports

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→