【球壇義工】自由身本田圭佑網上自薦:「我想踢曼聯,人工都唔要!」

睇足365 於 29/09/2019 發表 收藏文章
今時今日,足球員薪俸水漲船高,幾十萬歐元周薪嘅大有人在,就算喺大球會做大後備,超過10萬歐元周薪亦足為奇,對一般人嚟講已經可以一世無憂,難怪有部分球星去到職業生涯階段,追求嘅係尋求新挑戰,而非「掘金」。近日向曼聯自薦嘅日本球星本田圭佑,唔知係咩心態,但就一定唔係為咗份人工!


已經33歲嘅前日本國腳本田圭佑近日喺Twitter上面發表一段語出驚人嘅說話:佢話:「請我啦!我唔需要錢,只需要效力偉大嘅球會,同偉大嘅隊友一齊踢波!」最後仲tag咗曼聯嘅官方Twitter,擺明係向曼聯示好。



本田圭佑自從2007年離開名古屋鯨魚之後,一直出國搵食至今,踢過荷蘭球會芬洛、俄超勁旅莫斯科中央陸軍、AC米蘭等球會,相信已經「搵夠」,特別係近年去過墨超帕丘卡及澳職墨爾本勝利,相信人工唔會平。不過,如果話本田圭佑喜愛接受新挑戰,亦相當有說服力,皆因佢喺2018年效力墨爾本勝利時,接受柬埔寨國家隊邀請擔任主帥,令人十分驚訝,職業足球員兼任教練唔出奇,不過喺另一個國家做國家隊主教練就真係罕見。


據了解,本田圭佑平日喺澳洲練波之餘,亦要同柬埔寨國家隊職員進行視象會議,有國際賽期就會同柬埔寨國家隊會合,相當充實。其實,喺上一輪國際賽中,柬埔寨主場迎戰香港,香港球迷更見識到柬埔寨嘅進步及本田圭佑嘅臨場調動能力,幫助球隊逼和世界排名較高嘅香港隊。


2019年5月,本田圭佑離開墨爾本勝利,成為自由身,自今未有落班,但亦未有宣布掛靴,相信佢仲有夢要追。曼聯今季表現不穩,喺最近一場聯賽盃只能憑互射12碼驚險淘汰英甲下游球隊羅奇代爾,近況相當令人擔心。的而且確,本田圭佑已年屆33歲,而且從未踢過英超,適應上有困難,但本田圭佑可司職進攻中場及左右兩翼,反正曼聯中場創造力不足,加上賣波衫嘅因素,如果真係唔使出人工,真係抵諗㗎。

本田亦十分努力學習英語:

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→