玻璃心爆發,CCTV唔播阿仙奴對曼城 中國球迷:祝奧斯爾斷腳

睇足365 於 15/12/2019 發表 收藏文章
相信大家已經知道,阿仙奴球星奧斯爾 (Mesut Ozil) 最近因網上言論而得罪中國,事件喺中國引起掀然大波,繼火箭總經理莫利 (Daryl Morey) 撐港言論被杯葛後,阿仙奴亦成為眾矢之的。


事源於本身係土耳裔穆斯林信徒嘅奧斯爾於Twitter上發聲,指責中國於新疆逼害維吾爾族人,設立集中營、強逼維吾爾族人放棄穆斯林信仰、強逼維族女性與漢人結婚。奧斯爾批評穆斯林世界對於中共暴行視而不見,未有為維吾爾人發聲,直指「默許暴行即為暴行罪孽」,更於Twitter帖文背景用上「東突厥斯坦」旗幟,徹底激嬲中國「愛國人士」。

喺中共官方文宣中,「東突厥斯坦」就係意圖「分裂中國」嘅「疆獨」「恐佈分子」,因此中國國內媒體一致發文譴責奧斯爾意圖「分裂中國」及分開支持「恐佈分子」。喺網上足球社群中,「愛國」球迷咒罵聲不絕,有阿仙奴球迷主動割蓆,稱只要見到阿仙奴再派出奧斯爾落場比賽,就會燒波衫兼罷睇,好似講到龍格保真係會睇你comment咁。


事情最新發展,中央電視體育台原定已列出直播星期日深夜阿仙奴對曼城嘅大戰,但臨時抽起,改為錄播同一輪嘅狼隊對熱刺,做法十分突兀。


除此之外,阿仙奴於中國國內嘅官方公關渠道「阿森纳足球俱乐部官方微博」發表聲明指奧斯爾言論只屬個人意見,球會並不參與任何政治表態,但有「心水清」嘅「愛國球迷」馬上指出官方微博只係中國人自己營運,唔代表遠在倫敦嘅阿仙奴會方真正重視事件,要求阿仙奴於官方網站、Twitter、Instagram發出同樣聲明,以及雪藏奧斯爾。



截至現時,阿仙奴官方未有任何行動,「愛國球迷」就繼續喺國內社群發炮,有人表示曾經雪藏佢嘅前主帥艾馬利原來係「反恐精英」,有人開始以奧斯爾外貌及其土耳其血統作出攻擊,有人「祝」奧斯爾被踢斷腳結束職業生涯。有人上傳自己於「懂球帝」上unfollow「阿森納」及剪奧斯爾波衫嘅圖片,如此幼稚行為,引人發笑。


當初車路士小將堅尼地涉嫌辱華風波、NBA火箭撐港風波,漸漸已經不了了之,唔知「愛國球迷」杯葛奧斯爾、杯葛阿仙奴、杯葛英超,又可以堅持幾耐?畢竟全世界都係中國敵人,全世界都唔尊重中國,不如唔好接觸任何一切與外國相關嘅事物,唔好去旅行、唔好出國讀書、唔好同外國做生意,實行鎖國政策。原來一個足球員講一句說話已經可以分裂國家,已經係侮辱國家,咁中國人記得用相同標準看待自己,千萬千萬唔好評論人哋啲嘢。



諗起一樣嘢,以狗仔嚟講,通常出街散步嗰陣最惡嘅就係芝娃娃之類,最鍾意見其他狗行過就吠,大概係出於自卑啩。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→