【無需送禮】鹿晗出任「曼聯紅魔使者」,球技了得「真曼迷」獲最高榮譽

睇足365 於 01/02/2019 發表 收藏文章
世界各大豪門一直為咗亞洲市場絞盡腦汁,甚至不惜簽下級數明顯未達標嘅亞洲球員去提升球隊喺當地嘅吸引力。曼聯曾經簽下董方卓,競技層面上係失敗之作,此後再冇簽下任何中國球員,不過最近就「簽下」一位中國明星,應該唔會係失敗之作。


2月1日,曼聯官方宣布委任中國藝人鹿晗為「曼聯紅魔使者」,更邀請佢到訪曼徹斯特。鹿晗早前已獲邀參觀訓練基地及與曼聯名宿白賴仁笠臣等一同觀看曼聯主場對白禮頓嘅賽事,同球星近距離接觸。


今年28歲嘅鹿晗,早年喺韓國留學及於韓國團體EXO出道,近年返回中國後人氣爆燈,最誇張嘅例子係佢喺2014年發表一則微博帖文,獲健力士世界紀錄官方確認,以13,162,859條評論創下世界紀錄,係中國社交媒體嘅首個世界紀錄,但佢喺2015年發表一則關於曼聯、名為《十年相依,終身紅魔》嘅微博帖文,評論已經超過上述紀錄。


鹿晗除咗以外貌同幕前多才多藝嘅演出風靡全中國之外,佢亦係以擅長運動見稱嘅藝人,足球、籃球、乒乓球、欖球等運動全部難佢唔到。特別係足球,從多段網上影片可見,佢有一定足球基本功,可以做出各種花式動作。


另外,最重要嘅係佢的確係一位真正嘅曼聯球迷,佢將會運用個人嘅人氣為曼聯做宣傳,以及進行公益活動。曼聯中文官網早聞稿截錄如下:

引用曼聯在中國擁有比在全球其他國家更龐大的球迷群體,並且是微博等社交媒體上關注者最多的足球俱樂部。包括#ILOVEUNITED球迷派對在內的各類線下活動深受球迷喜愛,俱樂部亦不斷通過新穎的線上渠道和活動與球迷保持互動。相信藉由與鹿晗的創新跨界合作,俱樂部將吸引更多群體認識參與足球運動,了解曼聯的歷史與輝煌,並關注曼聯的動態和發展。

以一個球迷嚟講,獲封為官方大使可以算係最高榮譽,唔知「宋禮勤」呢一刻有咩心情呢?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→