瀟灑哥教踢波!貝碧托夫撐盧卡古:「但佢要踢得簡單啲」

睇足365 於 26/10/2018 發表 收藏文章
曼聯前鋒難做,喺呢個表現極受注視嘅位置上,稍有不足就會被全球球迷批評及恥笑得體無完膚。盧卡古生活喺轉會費大通漲嘅年代,身價不菲更令佢壓力倍增,曼聯近來整體戰績差勁,盧卡古又遇上入球荒,難免成為「箭靶」。不過,若然盧卡古本身質素真係極為不堪,又難以解釋佢何以喺比利時國家隊有不俗表現。作為同路人嘅前曼聯前鋒貝碧托夫就認為盧卡古受到嘅批評並唔公平,更提點佢要踢得簡單。


人稱「瀟灑哥」嘅貝碧托夫,都曾經有表現不穩嘅時候,效力曼聯四季射入56球,數據上亦唔算神級,不過總括而言,相信佢仍然屬於今日曼聯球迷懷念嘅前鋒之一。「瀟灑哥」近日接受訪問時,就回應咗外界對於後輩盧卡古嘅批評:

「最近好多人鬧盧卡古,不過身為前鋒嘅我知道前鋒嘅辛酸,所以絕對唔會咁樣批評其他前鋒。我喺曼聯都試過狀態低迷,七、八場比賽入唔到波,但之後一場我入咗5球,呢種事喺任何人身上都有可能發生。


我知道佢已經8場冇入過波,不過我認為對佢嘅批評係唔公平嘅。正如摩連奴所講,佢為球隊而十分努力。不過呢樣嘢有可能產生反效果。

佢好想表現自己,所以佢做嘅嘢太多,但就偏偏冇做到最基本嘅嘢——壓入禁區。佢將事情複雜化,例如你唔會想見到佢好似上場波咁返到左閘位防守。」

貝碧托夫認為,盧卡古喺曼聯做嘅嘢太多,令佢冇專心去做一個前鋒最應該要做嘅工作——喺禁區尋找機會,所以佢應該還原基本步,多啲留喺禁區,咁應該好快會搵返入波嘅感覺。當然,我哋唔會知道呢個情況係盧卡古自己嘅問題,定係摩連奴嘅指示,不過盧卡古喺比利時國家隊的確踢得比較簡單而高效。


Source: betfairESPN

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→