泰國世界排名低43位照贏,「大簡」出師不利中國隊中國盃連續三年不入決賽

睇足365 於 22/03/2019 發表 收藏文章
中國足協上星期委任廣州恆大淘寶主帥簡拿華路(Fabio Cannavaro)出任中國集訓隊主教練,帶隊出戰今個國際賽期舉行嘅中國盃,雖然名目上簡拿華路並未成為中國國家隊正式主帥,但實際上按中國傳媒預測,今次任命已經表示佢好大機會「坐正」,中國足協更請到原主帥納比以顧問身分留隊協助「大簡」。不過,「大簡」今次出師不利,未知會否影響原定計劃。


中國隊於自家舉辦嘅中國盃賽事上,邀請到烏拉圭、烏茲別克及泰國參賽練兵,首場比賽就面對泰國。中國隊喺世界排名上比對手高出43位,中國隊排72位而泰國隊只排115位,喺亞洲內亦相差12位。不過綜觀往績,泰國雖然未去到可以稱為「中國殺手」,但雙方史上交戰7次,各取得3勝1和,更係同樣攻入對手11球,絕對係勢均力敵。


比賽屬半友誼賽性質,效力愛斯賓奴嘅中國前鋒武磊獲得「免役」,專注訓練及融入球隊,因此中國隊今仗派出董學升及韋世豪正選攻堅,中場有蒿俊閔、吳曦、張稀哲及王永珀列陣,後防則由張琳芃、馮瀟霆、高準翼及李磊壓陣,顏駿凌把守大門,其中董學升及高準翼屬國家隊新丁。
事實上,泰國隊之所以同中國隊一直勢均力敵,今仗場面已經可以解釋大部分原因,泰國隊球員身材比較矮細,但專注以靈動踢法組織地面攻勢,多次威脅中國隊大門。要不是泰國前鋒卡拉宋 Adisak Kraisorn 起碼三次錯失單刀或空門良機,加上顏駿凌有精彩撲救,今仗中國隊有可能再失幾球。

(泰國隊多次做出精妙配合,但卡拉宋屢失良機)

泰國隊最終憑效力日職球隊北海道札幌岡薩多嘅「泰國美斯」猜拿帖(Chanathip Songkrasin)入波一箭定江山,以1-0擊敗中國。中國隊就連續三年不入中國盃決賽,3月25日會同烏拉圭對烏茲別克嘅敗方爭季軍。


賽後,中國隊再次受到中國球迷猛烈批評,其中有人認為球員喺比賽中態度唔積極,詳情可見《國足三將進攻中前插不積極,遭網友質疑:這是在散步呢?》。簡拿華路更成為中國近12年嚟首位上任首戰輸波嘅主帥。

全場精華


Source: 新浪體育

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 陳大文2
    陳大文2 於 22/03/2019 評論 NO. 1

    咁都冇得打飛機,谷精上腦

快捷鍵:←
快捷鍵:→