法甲摩納哥近十場不勝勢炒渣甸 ESPN:亨利將接任主帥

睇足365 於 10/10/2018 發表 收藏文章
法甲自從巴黎聖日耳門於2012-13球季取得聯賽冠軍開始,至今一直保持一隊獨大嘅情況,近六個球季間,只有一支球隊曾經打破 PSG 壟斷,就係摩納哥於2016-17球季藉由麥巴比及湯馬士林馬 (Thomas Lemar) 發起青春革命,加上法卡奧壓陣,成功力壓PSG奪冠。萬萬估唔到,上一季仍然係法甲亞軍嘅摩納哥,今季初段表現極度不濟,已身處降班區,功勳主帥渣甸 (Leonardo Jardim) 勢必被炒。《ESPN》消息指出,前法國名將亨利即將赴任,《Sky Sports》則確認摩納哥正在接觸亨利。


16-17球季奪冠陣容中,雙星麥巴比及湯馬士林馬已分別加盟PSG及馬德里體育會,中場大將祖奧摩天奴 (João Moutinho) 、貝拿度施華 (Bernardo Silva)、巴卡約高 (Tiemoué Bakayoko) 、法賓奴 (Fabinho),以至左閘班捷文文迪 (Benjamin Mendy) 早已投奔英超 (其中巴卡約高今季由車路士外借AC米蘭),實屬人面全非。不過,摩納哥今季於夏季轉會窗亦斥資1.28億歐元引入大批球員,包括比利時翼鋒查迪利 (Nacer Chadli) 及俄羅斯新星高路雲 (Aleksandr Golovin) 等,理應可以保持一定實力。


法甲開季已經踢咗9輪賽事,摩納哥竟然只得1勝3和5負,以6分排第18位,連同歐聯,已經近10場未取一勝,頹得太誇張,結果主帥渣甸雖然有問鼎法甲冠軍嘅功績,仍難逃被炒。執筆之時,摩納哥尚未正式宣佈渣甸離任,不過根據《ESPN》消息,摩納哥其實已經決定炒人,更會由亨利接任。


前法國國腳亨利效力祖雲達斯及阿仙奴前,曾經效力摩納哥並取得1996-97法甲冠軍,退役後跟隨比利時國家隊主帥馬天尼斯 (Roberto Martinez) 任助教,今個夏天聯手帶領比利時取得世界盃季軍,最近盛傳亨利係英冠球隊阿士東維拉嘅領隊熱門人選之一。《ESPN》報導指,摩納哥將會任命 (set to name) 亨利成為新任主帥,球隊同時曾經考慮過嘅人選包括同樣係前阿仙奴及法國球員嘅皮利斯 (Robert Pires) 、河床教練加拉度 (Marcelo Gallardo),以及前PSG主帥白蘭斯 (Laurent Blanc)。


《Sky Sports》就證實,摩納哥正在接觸亨利,希望佢接手帶領球隊,不過亨利並非唯一候選人,例如人稱「補鍋匠」嘅神奇教練雲尼亞里 (Claudio Ranieri) 亦屬候選人之一。另外,相信亨利一旦得到執教摩納哥嘅機會,將會放棄爭取阿士東維拉教職。


Source: ESPNSky Sports

如果喜歡我們的文章,請即分享到︰

標籤: 法甲  摩納哥  雲尼亞里  皮利斯  亨利  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→