《法國足球》:雲加將於一月取代加度素成為AC米蘭主帥

睇足365 於 06/11/2018 發表 收藏文章
前阿仙奴領隊雲加自從上季尾離任之後,去向一直受到關注,曾經一度被傳接任巴黎聖日耳門體育總監,但最終未有成事。近日歐洲球壇有幾支豪門帥位動搖,休息近半年嘅雲加亦成為被討論嘅接任人選之一,例如皇家馬德里、拜仁慕尼黑,不過未有想過,近日聯賽排名回升嘅AC米蘭都喺換帥傳聞之中。據《法國足球》(France Football)報導,AC米蘭正邀請雲加出任主帥,更認為談判已經接近完成。


AC米蘭自從由名宿加度素執教之後,似乎暫時平定近季嘅亂局,不過球隊喺部分比賽中,場面上表現得未如人意,加度素於心態上可以穩定軍心,但於排兵佈陣、臨場調動上屢受批評,因此換帥之聲間中都喺AC米蘭球迷中響起。然而,大部分球迷都明白,球隊處於重整期,暫時已經不可能要求更多,AC米蘭上仗1-0小勝烏甸尼斯後,以21分及較佳得失球差升上第四位,係加度素上季中途上任以嚟最高排名,如果能夠以呢個排名完成今季,重返歐聯,已經係一大成就。加度素並非長遠執教之選,但以過渡重整時期嚟講,佢已經做得唔錯,所以AC米蘭如果急著喺季中換帥,多少令人有啲意外。


至於雲加,呢位69歲法國教練喺上月參加慈善賽,接受訪問時表示將會喺2019年1月1日再次開始工作,但就未知目的地,根據《BBC》報導,佢最近又表示, 絕對唔會再執教英格蘭球會:「我已經將一生奉獻俾一間球會,再執教另一間英格蘭球會將會係好困難而且不能接受嘅事。」


根據金球獎主辦機構《法國足球》報導,AC米蘭近幾個星期已經同雲加進行多次會面,即將達成共識,聘任佢為主教練,佢亦將會得到體育總監李安納度分出更多權力。


有指《法國足球》一向並非以報導準備消息見長,傳聞真確程度姑且疑中留情。不過值得留意嘅係,AC米蘭最近已經委任前阿仙奴CEO加齊迪斯 (Ivan Gazidis) 於12月1日起上任CEO一職,加齊迪斯與雲加再次合作或者係AC米蘭高層「早有預謀」之舉。另外,報導指出AC米蘭迎任班主 Paul Singer 及其子 Gordon Singer 都係阿仙奴球迷……

Source: France FootballFox SportsBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→