沙利：「一早講明唔會用，我都唔知道點解『飲水哥』仲喺度」

最近，已經幾近成為球壇「失蹤人口」嘅車路士中場真禾特 (Danny Drinkwater) ，用咗一個唔適當嘅方法重新成為焦點，佢喺英國因為醉酒駕駛而被檢控 (《「飲水哥」飲太多，車路士中場真禾特被控醉酒駕駛》) ，令球迷對仍嘅前途重新感到興趣，畢竟佢喺車路士主帥沙利麾下只上陣過30分鐘。


因為醉酒駕駛事件，沙利最近被傳媒問到關於「飲水哥」嘅前途問題。沙利坦言，佢上任時已經清楚表明，因為戰術需要，「飲水哥」上陣時間將會極少，勸佢離隊他投：

「上年8月轉會市場開啟嗰時，我已經同佢傾過。我同佢講，叫佢喺出面搵下其他機會，因為我認為佢喺呢度唔會有得踢。我同佢解釋咗我嘅諗法，但佢都係留低。」

「我同佢關係好好，因為我覺得佢係一個好人、好球員，但只係唔適合我。」

「佢清楚知道點解冇得踢，原因係我認為佢唔適合我嘅戰術體系同踢法。我8月已經同佢講，佢都好高興我開誠佈公，但佢決定留低，所以佢好清楚知道情況係點。」
再被問到點解「飲水哥」仲喺車路士，沙利表示：「我都唔知道。可能佢希望我哋會改變啩？」

另外，沙利表示醉酒駕駛事件後，仍未有時間同「飲水哥」坐低傾下，因為佢現時正專心準備歐霸對布拉格斯拉維亞嘅比賽。「飲水哥」當然唔喺隨軍作客嘅名單之中。

真禾特上季以近3,500萬英鎊轉會費加盟車路士，當季只上陣12場聯賽，今季自沙利上任後，更指曾於開季社區盾登場30分鐘，只今再冇上陣。

Source: Sky Sports 、 ESPN