水晶宮人人自危(誤)！鄰隊名宿突成候任領隊

英超球隊水晶宮原本由鶴臣執教，不過呢位老帥決定退休，球隊需要為來季主帥人選煩惱。水晶宮尋覓新任主帥嘅過程可謂峰迴路轉，消息指佢哋本來已經同一位名帥接近完成簽約，但最後功虧一簣，現時又再鎖定一個新人選……

根據Sky Sports及著名記者David Ornstein報道，水晶宮現時與法甲尼斯前主帥韋拉（Patrick Vieira）已達成協議，委任後者出任水晶宮領隊一職。David Ornstein獨家消息指出，水晶宮即將宣布委任韋拉為主帥，不過雙方仍未正式簽約，只係雙方已就條件達成共職，同時仍需申請工作簽證，但水晶宮方面相信談判已經完成。


現年45歲嘅韋拉為法國及阿仙奴名宿，佢執教生涯第一份工作係喺執教美職聯嘅紐約城，兩年半任內令紐約城由第17位跳升至第2位，口碑不俗，得以跳槽到法甲尼斯。不過，同樣執教兩年半後，尼斯陷入一段低潮，包括5連敗及於歐霸分組賽被淘汰，令韋拉於2020年12月被辭退。一旦執教水晶宮，將會係佢自2011年於曼城退役後再次重返英超，不過係以教練身份。至於點解水晶宮人人自危？呢方面就要問問安歷卡，有關黑色大肉腸嘅故事！

韋拉球員時代霸氣十足，相信佢自有辦法令麾下球員貼貼服服。英超環境對佢嚟講亦都唔陌生，不過執教始終唔同踢波，執教水晶宮稍有不慎就會進入護級漩渦，壓力不可謂不大！


另外，雖然David Ornstein指水晶宮深信短期內就可以完成簽約，但原來Sky Sports指韋拉已經係近3個星期內第3位同水晶宮達成協議嘅領隊，之前嘅兩位先後係前狼隊主帥紐奴及前多蒙特主帥法夫利，但最終兩人都未能成事。報道指水晶宮上星期本來已經同前多蒙特主帥法夫利傾妥，只剩工作簽證及教練團隊等細節未處理好，但法夫利於最後關頭拒絕簽約。