比甲翼鋒為求轉會可以去到幾盡?著第二隊波衫返球會踩場

睇足365 於 06/01/2021 發表 收藏文章
足球員職業生涯短暫,所以制遇特別重要,有時不論係為咗榮譽定金錢,球員去到咁上下就可能會希望尋求新發展。如果冇辦法得償所願,有部分球員就會採取極端行動,逼使球會就範放行,例如罷操、罷賽之類,甚至有人要脅要射自己龍門,不過都未必夠今次咁精采。


比利時甲組聯賽球隊安特衛普翼鋒林卡斯 (Didier Lamkel Zé) 據悉正希望離隊,以轉投希臘球隊彭拿典奈高斯,早前佢應球會要求返回訓練場 (有指係為咗例行嘅武肺病毒檢驗) ,呢位一心轉會嘅喀麥隆國腳竟然身穿另一隊比甲球隊嘅波衫返到安特衛普報到,佢所著嘅係印有保拿斯 (Yannick Bolasie;2019年由愛華頓外借) 名字嘅安德列治波衫。

loading

loading

雖然安德列治與安特衛普關係並非傳統打吡戰對手,但畢竟身穿同一聯賽另一支球隊嘅球衣,係對現球會一個極不尊重嘅行為,所以林卡斯被訓練場保安拒絕進入設施。唔知個腦諗乜嘅林卡斯,仲意圖硬闖玻璃門,同保安員鬥力,真係相當尷尬,而事件當然極速成為網絡熱話。


點知隔咗一陣又即刻後悔,向球會、職員、隊友及球迷道歉。佢表示自己個心已經飛走咗,所以做出過激舉動,但佢又話球會、職員、隊友及球迷一直以嚟都對佢好好,一直好支持佢,所以要道歉。雖然佢肯道歉係好事,但成件事真係睇得出佢個人「神神化化」。

loading

報道指,現時彭拿典奈高斯嘅教頭正正係過去三年執教安特衛普嘅波隆尼 (László Bölöni),佢喺今季開始時轉任亨克教頭,但只執教3場就被炒,10月起出任彭拿典奈高斯主帥,而26歲嘅林卡斯就希望同恩師再續前緣,並同彭拿典奈高斯傾好個人條件,不過球會之間未就轉會費達成共識。

有趣嘅係,安特衛普喺一日前正正邀請咗前安德列治主帥韋高特朗 (Franky Vercauteren) 成為新領隊,而林卡斯又係著住安德列治波衫返球會鬧事,佢道歉之後仲補多一句話「如果新教練用得著我,我都好樂意留低」,都咪話唔搞笑!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→