「比巴塞更巴塞」? 國際米蘭組織12腳傳送埋門巴塞得個睇字,輸波照俾球迷激讚

睇足365 於 03/10/2019 發表 收藏文章
國際米蘭今季由意大利名帥干地執教,一上任就立竿見影,不但現時喺意甲佔據榜首位置,昨晚歐聯作客巴塞隆拿嘅大戰中,更有好表現,可惜最後功虧一簣,但仍無阻球迷欣賞佢哋嘅漂亮足球。


昨晚歐聯分組賽大戰,巴塞隆拿主場迎戰國際米蘭,藍黑軍團開賽僅僅兩分鐘就反客為主,由巴塞舊將阿歷斯山齊士傳出直線,拿達路馬天尼斯力壓朗格勒先開紀錄。國際米蘭作客領先後更肆無忌憚打出精彩短傳配合,上半場尾段,國米門將漢丹奴域向橫短傳開出龍門球,面對巴塞前場逼搶,國米後場球員從容不逼回傳予漢丹奴域,呢位經驗老到嘅35歲前斯洛文尼亞國門證明自己完全能符合新派門將腳法要求,藝高人膽大地等待巴塞球員埋身,再挑傳俾迪維積,迪維積用頭點俾靠近底線嘅高甸,開始後場組織。



簡達華喺邊線拎到波後,長傳俾中路嘅山齊士,再彈到落巴列拿腳下。巴列拿隨即分到邊路俾準備向前推進嘅辛斯,後者引球推一段之後再同拿達路馬天尼斯打撞牆配合,一個 one-two 馬上起腳射門,可惜僅僅高出。

龍門球規則更新之後,唔少鍾意開短龍門球嘅球隊都遇上麻煩,因為對手只要皮球開始滾動就可以衝入禁區,令逼搶成效更大,阿仙奴就曾經因此而大意失波。


國米完美示範咗適應新規則嘅能力,佢哋好明顯曾經喺訓練中不斷演練球員應對逼搶時嘅走位,喺呢一球中,國米球員可以話合埋眼都知道隊友位置喺邊,自然可以從容不迫地化解巴塞逼搶,更同時化危為機,把握巴塞上前逼搶後失位,迅速組織攻勢瓦解巴塞防守,連續造出12腳傳送後完成射門。

可惜,國米最終未能「殺死比賽」,巴塞換入維度加強中路活力後,蘇亞雷斯接連攻入兩球靚波反勝。兩戰過後,國米只得一和一負,而巴塞就取得一勝一負。


Source: Sportbible

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→