【正衰仔】阿仙奴被森林淘汰前夕,伊禾比夜蒲兼疑開毒P至半夜3點

睇足365 於 09/01/2018 發表 收藏文章
阿仙奴快車期聯賽4戰只得1勝,都仲可以話和到利物浦同車路士,勉強收貨,但喺足總盃竟然以4-2不敵英冠球隊諾定咸森林,加上有傳即將出售山齊士、高基連、迪布治、禾確特等將,成績、士氣同陣容深度上,情況都十分令人擔憂。獲得雲加重用嘅小將伊禾比,最近被英國傳媒指,喺對諾定咸森林前夕狂歡至深夜,而佢喺比賽中表現確實未如理想,為兵工廠再添紀律問題。


呢位21歲嘅尼日利亞小將深得雲加信任,唔少球迷都對此不滿,其實此子確實有一定天份,佢腳下功夫不俗、傳球富想像力,但動作往往俾人慢半拍嘅感覺,decision-making亦未如理想,呢方面的確係佢要加強嘅地方。喺足總盃作客諾定咸森林一役,喺輪換陣容之下,佢出任正選攻中,身邊嘅只係禾確特、艾蘭尼、韋碧克幾位平平無奇嘅一隊副選,加上小將韋諾克 (Joe Willock)及尼爾遜 (Reiss Nelson),要佢做組織核心派牌實在係巧婦難為無米之炊,而球隊亦都冇第二個擁有組織能力嘅球員在陣。


結果,球隊進攻毫無板斧,只靠隊長梅迪薩卡死球趁亂射入一球,同韋碧克幸運地把握對方門將甩手建功,防守上被對手策略性打爆,輸2-4出局。喺《Sky Sports》賽後報告中,伊禾比獲評不合格嘅4分,全隊只有直接犯錯導致失波嘅賀定得到更低評分。喺《Whoscored》評分中,佢都只得到6.2分。

如果表現差但努力過,球迷應該冇咁嬲,例如球迷對於勤力跑動嘅韋碧克就寬容得多,不過伊禾比最近傳出令人失望嘅消息。英國《The Sun》最近公開咗一段清楚拍到伊禾比嘅片段,聲稱佢喺作客諾定咸森林前一晚,喺倫敦中部一間屋入面開party,玩到半夜先走。


《The Sun》稱該段影片係喺半夜2:37am拍下嘅,佢哋又指呢一間Airbnb出租單位嘅鄰居投訴,該單位嘅噪音持續至半夜3:30am。咁都未算,報導指出個party中,有其他參加者喺度吸食大麻同吸笑氣,雖然冇證據顯示伊禾比有份,但都反映佢有明顯嘅紀律問題,唔知道被指係雲加會唔會嚴懲佢呢?


Source: The SunDaily Mail

如果喜歡我們的文章,請即分享到︰

留言


請按此登錄後留言。未成為會員? 立即註冊
  • somewhere 於 09/01/2018 評論 NO. 1

    阿迷見到最開心, 可以雪藏佢😂

  • 李奧152 於 10/01/2018 評論 NO. 2

    永久雪!垃圾!本身已經廢仲要唔努力,去玩!球員生涯已完!不過好彩佢遇到雲格鐘意玩屎忽

快捷鍵:←
快捷鍵:→