歐聯歐霸下季新例 球迷須知:一月新兵注冊不受限、開波時間調整

睇足365 於 28/03/2018 發表 收藏文章
歐洲足協公布 2018-19 球季一系列新規例,對歐聯及歐霸盃作出改動,其中包括加時階段增加一個換人名額,但講到影響最大,相信係更改淘汰賽階段注冊規則,同時比賽時間亦有所調整,值得各位球迷留意。


歐洲時間3月27日星期二,歐洲足協於官網上公佈一系列改革,2018-19 球季歐聯及歐霸盃生效,為期三季後再作檢討。

換人名額

早前,不少盃賽已經實行加時階段新增第四個換人名額嘅措施,歐聯及歐霸盃亦會於下季實行。喺淘汰賽階段,一旦球賽進入加時,球賽雙方即可以得到多一個換人名額,而唔會影響法定時間嘅三個名額。即係話,如果球隊90分鐘內已經換咗三個人,喺加時可多換一人,而如果球隊本身只換咗兩人,加時可以再換兩人,如此類推。


決賽大名單人數增加

根據原有規則,歐聯及歐霸一般比賽大名單可以有18人,即11名正選、7名後備球員。喺新規例之下,只限歐聯及歐霸決賽,比賽大名單將增至23人,即球隊可以安排12名後備球員候命。


比賽時間調整

歐聯:

分組賽階段,星期二及星期三比賽日各有兩場比賽將會喺歐洲中部時間 18:55 CET (香港時間深夜 01:55 ,夏令時間 00:55) 開賽,其餘於 21:00 CET (香港時間深夜 04:00,夏令時間 03:00) ,最後一個比賽日統一 21:00 CET (香港時間深夜 04:00,夏令時間 03:00) 開賽。淘汰賽階段,全部統一於 21:00 CET (香港時間深夜 04:00,夏令時間 03:00) 開賽。

歐霸:

分組賽至16強階段,同樣分為 18:55 CET 及 21:00 CET 兩個時段開賽,八強開始全部於 21:00 CET 開賽。


注冊規則

根據原有規則,球隊喺淘汰賽階段前注冊球員,如果球員曾經喺同一季入面曾代表其他球隊出戰該賽事,就唔可以注冊,例如巴塞中場古天奴季中由利物浦加盟,因為佢已經為利物浦參加過歐聯分組賽,所以巴塞唔能夠喺淘汰賽階段為佢注冊;歐霸方面,阿仙奴由多蒙特簽入前鋒奧巴美揚,因為多蒙特曾於歐聯分組賽階段注冊奧巴美揚,多蒙特隨後跌入歐霸盃,所以歐洲足協唔批准阿仙奴為佢注冊。

不過根據新例,淘汰賽階段,球隊可以無限制注冊三名新球員,冬季轉會窗新兵將可以為新球會上陣。

Source: BBCUEFA

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→