橫跨兩代!保方與馬甸尼之子交換波衫,已儲四對父子球衣:「我等緊佢哋個孫!」

睇足365 於 14/02/2020 發表 收藏文章
意大利門神保方縱橫球壇20多年,近年經常出現一個有趣情況,就係而家球場上嘅對手或者隊友,喺保方出道時仲未出世。雖然門將嘅職業生涯一般較長,但好似保方咁42歲仲為祖雲達咁嘅班霸把關,都唔係十分常見,而且佢似乎仲未打算退休,睇嚟仲有大把機會豐富佢嘅波衫珍藏。


保方上季毅然轉投巴黎聖日耳門尋求新挑戰,今季就重返祖雲達斯。昨晚意大利盃四強首回合,AC米蘭主場迎戰祖雲達斯,保方正選上陣,最終雙方踢成1-1平手。



賽後,保方十分興奮,向記者展示自己交換球衣嘅戰利品,係一件寫上98號馬甸尼嘅AC米蘭球衣。原來今仗AC米蘭派出球隊名宿馬甸尼之子丹尼爾馬甸尼 (Daniel Maldini) 上陣,18歲嘅丹尼爾馬甸尼係保羅馬甸尼 (Paolo Maldini) 次子,半個月前為AC米蘭一隊上演個人意甲處子戰,2001年出生嘅佢比保方年輕23年。正係喺2000-01球季後,保方轉投祖雲達斯,當時佢已為帕爾馬上陣168場聯賽!


保方表示,馬甸尼父子嘅波衫已經係自己第四對父子球衣收藏品,佢已經擁有韋亞父子、杜林父子,以及基艾沙父子嘅球衣。保方仲講笑話:「我等緊佢哋個孫!」


保方去年效力PSG時,AC米蘭名宿韋亞 (George Weah) 兒子添莫菲韋亞 (Timothy Weah) 係佢嘅隊友,當季首次為PSG一隊上陣,今季已轉投里爾。



法國名宿杜林 (Lilian Thuram) 同保方一樣曾經效力帕爾馬及祖雲達斯,佢嘅囝囝馬古斯杜林 (Marcus Thuram) 上季喺法甲曾經代表甘岡同保方交手,今季轉投慕遜加柏。


基艾沙 (Enrico Chiesa) 曾經與保方一同效力帕爾馬,兒子費迪歷高基艾沙 (Federico Chiesa) 就效力費倫天拿,已為意大利大國腳上陣17場。


Source: DailyMailGiveMeSport

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→