【橫空出世】18歲英格蘭小將踢德甲,僅用125分鐘榮登歐洲助攻王!

睇足365 於 01/10/2018 發表 收藏文章
老一代球迷經常會話,英格蘭球員出國搵食,成功嘅係少之又少。原因好可能同往日英格蘭球會青訓習慣將身體質素視為最重要一環,對比歐陸足球,的確少咗一點技術同戰術執行嘅訓練。不過喺足球全球化之下,各地足球風格開始融合,即係所謂「同質化」,令呢種情況開始轉變。近年,有艾歷迪亞由葡萄牙回流,亦有不少英格蘭小將得到外流機會,其中一位就係 Jadon Sancho 查頓辛祖。


查頓辛祖自幼學習於屈福特青訓系統,14歲時就被曼城青年軍挖角,但據報佢喺2017年同球會談判新合約時,得唔到有關一隊上陣時間嘅保證,於是要求離隊。最終,佢喺2017年夏天,以800萬鎊轉會費加盟德甲球隊多蒙特。第一個球季,佢已經不時被提升到一隊名單,德甲上陣12次,更貢獻1入球4助攻。


可能有部分球迷已經留意佢好耐,但佢真正橫空出世,就係今季嘅事。今季查頓辛祖正式成為常規一隊成員,雖然喺聯賽未得到正選上陣機會,但經常喺比賽末段後備入替。只得十幾分鐘時間,並冇令查頓辛祖成為「垃圾時間」冇意義嘅換人,因為佢喺今季德甲上陣6次,已經貢獻5個助攻及1個入球,留意佢上陣時間合共只有125分鐘,即平均每24分鐘就製造一個助攻。


即使唔計平均,6場5助攻亦已經係歐洲五大聯賽之冠,注意係同緊一班場場踢足90分鐘嘅球星比較,查頓辛祖只用每場平均20分鐘就成為暫時嘅「歐洲助攻王」!

又上季加盟起計,辛祖亦係效率王,平均每73.5分鐘貢獻一個入球或助攻。



查頓辛祖喺今季歐聯分組賽對布魯日得到正選上陣機會,對佢係一大鼓舞,以下一齊重溫佢喺最近一場德甲對利華古遜,後備上陣取得2個助攻嘅表現!


唔知修夫基幾時會將佢選入大國腳呢?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • kinfung
    kinfung 於 01/10/2018 評論 NO. 1

    英媒又泥,英格蘭超新星

  • Siu Leung Mui
    Siu Leung Mui 於 03/10/2018 評論 NO. 2

    新碧咸定新加斯居尼?

快捷鍵:←
快捷鍵:→