林柏特：早就知道點樣解決「雙特」問題

上一代英格蘭國家隊其中一個難題就係「雙特」並存嘅問題，足球唔係將最勁十一人擺晒出嚟就贏，雖然林柏特同謝拉特同樣係英格蘭同期首屈一指嘅中場球員，但兩人嘅分工同默契難以同西班牙嘅沙維同恩尼斯達媲美，某程度上係當時英格蘭未能取得好成績嘅原因之一。


時日太快，「雙特」來季同時成為主帥，謝拉特將會執教格拉斯哥流浪，而林柏特就會執教打比郡。踢而優則教未必個個得，但相信唔需要擔心林柏特，因為佢出名擁有150 IQ，屬於天才級。「林伯」最近接受訪問時表示，佢一直都知道點樣解決「雙特」並存問題：

「如果係我排陣，我會排出三中場，而唔係用我哋兩個打雙中場。

我會擺多一個夏格維斯、卡域克或者史高斯咁嘅球員。喺我個年代，英格蘭通常只得一個有級數嘅前鋒，好似奧雲同朗尼咁，但國家隊會加多個高治或者希斯基打雙前鋒。」

林柏特認為英格蘭國家隊大部分時間太沉迷442陣式，但佢認為打單箭頭效果會更好，一來好少同時出現兩個有質素嘅前鋒，二來可以增加一個防守中場。

「呢個問題本來好容易就解決到，仲可以俾邊路球員切入中路，增加中場控制力。呢個應該係我哋大家都鍾意嘅踢法。
我哋兩個人，有時要面對西班牙咁樣嘅五人頂級中場，真係完全冇得鬥，我哋已經盡咗力。」

的確，「林伯」喺車路士有馬基利尼或者艾辛之類嘅中場幫助，但去到英格蘭，佢同謝拉特兩個同樣喜歡前插嘅中場同時出場，就要有一個留後，變相唔係踢緊自己最舒服嘅位置。


「我哋兩個喺球會都有另一個中場喺身後確保防守，所以我哋可以自由跑動。我同謝拉特拍檔嗰陣，得唔到類似嘅保護，我哋要不斷顧慮大家嘅相對位置。不過喺比賽中，如果每次下決定之前，都要諗多一步，究竟我上定佢上，就算只係等多一等，已經令你唔可以喺適當時間去到適當位置。」

「其實好簡單，不過我哋冇咁做。艾歷臣喺2004年試過用菱形中場，不過冇人願意做最後嗰個。

卡比路強調我哋嘅防守責任，確保我哋其中一個一定要睇到對方嘅背脊個號碼。咁樣代表我永遠都喺度留意住謝拉特嘅背脊，而唔係前插。


咁有時係令我哋冇咁易輸波，但點解唔用加利夫巴利 (Gareth Barry) 取代希斯基呢？

朗尼有能力踢單箭頭，不過卡比路忠於442，冇人同佢講呢個另一個方法！」

Source: Daily Mail