本田圭佑又有新搞作,東京成立新球會

睇足365 於 15/01/2020 發表 收藏文章
日本球星本田圭佑向來喜歡挑戰自己,近年佢做過嘅事,包括開設YouTube頻道、做生意、一邊執教柬埔寨國家隊一邊喺澳職做球員、重返歐洲球壇效力恩師執教嘅維迪斯……33歲嘅佢短暫效力維迪斯之後,球員生涯方面暫時成為自由身,不過佢喺其他方面都唔會停落嚟。


本田圭佑噚日就喺Twitter上面宣布,成立一間新球會,名為「One Tokyo」。本田喺Twitter上面話,2020年會重新出發,佢希望由零開始創立一間所有人共同參與嘅球會。

loading


本田喺新開始嘅球會網站上面透露,呢個想法源於自己近年一次失敗經歷。本田於2015年以名下公司收購奧地利球會 SV Horn ,成為班主。呢間球會於奧地利乙組聯賽征戰,本田表示佢喺上年決定因為管理問題而退出。佢認為透過由零開始建立一間球會,可以有更大空間從錯誤中學習。

由於新球會「One Tokyo」連球員都未有,所以本田圭佑公開呼籲渴望勝利嘅球員前來試腳。1月24日,「One Tokyo」將會於東京進行公開招募,條件主要有兩個:球員需要喺東京居住,以及可以每天參加訓練。另外,參加試腳嘅球員要提交5000日圓參加費。


本田圭佑稱,球會目標係以東京為中心,影響東京以至世界,更要以成為世界第一為目標。不過,本田未有透露球會將會喺咩時候參加日本聯賽。

Source:
本田圭佑、新クラブ『One Tokyo』設立を発表! “リアルサカつく”実現を目指す
https://onetokyo.jp/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→