【有片】升班係今年!列斯聯開波16秒閃電入球,大炒西布朗暫登榜首

睇足365 於 02/03/2019 發表 收藏文章
英格蘭次級聯賽——英冠,擁有唔少大家熟悉嘅名字,列斯聯、諾域治、錫菲聯、米杜士堡、阿士東維拉、史篤城等等,呢啲褪色嘅傳統球會正為重返英超嘅榮譽及天文數字嘅商業收益而奮鬥。正因如此,即使係啱啱先降班到英冠嘅史篤城,亦絕無輕易重返英超嘅道理,更要為留喺英冠而苦苦掙扎。闊別英超多年嘅列斯聯,捱過14年後,今年有名帥比爾沙執教,似乎係最有機會升班嘅一年。


今季英冠榜首位置爭持激烈,諾域治同列斯聯一直叮噹馬頭,今周進行嘅英冠第35輪賽事,列斯聯主場出擊面對西布朗。列斯聯派出前皇馬門將卡斯拿 (Kiko Casilla)、前史雲斯翼鋒柏保路靴南迪斯 (Pablo Hernández) 、曼城借將積夏里遜 (Jack Harrison) 及前車路士前鋒班福特 (Patrick Bamford);西布朗就有格列多遜 (Craig Dawson) 、積洛迪古斯 (Jay Rodriguez) 、埃及國腳中堅希加斯 (Ahmed Hegazi) 、前英格蘭國腳加里夫巴利 (Gareth Barry) 、前熱刺中場利維摩亞 (Jake Livermore) 、威爾斯國腳笠臣簡奴 (Hal Robson-Kanu) 等。


今場比賽一開波,西布朗就長傳失去控球權,列斯聯嘅柏保路靴南迪斯喺禁區頂遠射破網,16秒即先開紀錄。


其後,西布朗不乏攻勢,但總係因最後一傳或埋門把握力欠佳而無疾而終,反而喺28分鐘就被班福特單刀射成2-0。班福特再於下半場射門省中人改變方向入網,令列斯聯領先至3-0。完場前,阿里奧斯基門前接應橫傳,輕鬆射入空門,助列斯聯以4-0大勝西布朗。


由於榜首嘅諾域治要喺香港時間今晚 (3月2日) 23:00 先作客米禾爾,令先踢一場嘅列斯聯以一分優勢暫時登上英冠榜首,但諾域治今晚只要和波仍能憑得失球優勢重返榜首。


全場精華

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→