曼城小勝紐卡素大巴陣 哥帥:「希望對手踢返真正足球,不過我哋總有方法贏波」

睇足365 於 28/12/2017 發表 收藏文章
聖誕快車賽期,曼城剛剛作客到紐卡素,以1-0小勝而回。奉行「實用主義」嘅名帥賓尼迪斯喺呢場面對無人能擋嘅曼城,當然係嚴陣以待「泊大巴」搏偷雞,但可惜都係以一球之差僅負。


曼城喺賽前已經錄得55分,以12分之差領先第二位嘅曼聯,得失球差更加錄得+48,平均每場入超過3球。難怪「肥賓」嘅紐卡素成場波大部份時間將全隊11人縮喺個波後面,「泊大巴」伺機反擊,但得到嘅機會唔多,全場只錄得4射2中。至於控球率達到74%嘅曼城,全場就錄得15射6中,喺31分鐘由迪布尼長傳助攻俾史達寧射成1-0。

賽後,曼城領隊哥迪奧拿同《Sky Sports》進行訪問,佢認為對手過於保守,甚至唔打算去比賽,令今場贏得有啲艱難:

「我想對手係真係嚟踢波,為咗足球本身、為咗觀眾、為咗所有人都好。不過每一個領隊有權決定自己想點做。」

「我哋需要去尋找攻擊佢哋嘅方法,佢哋11個人喺晒禁區入面,有一個前鋒跟住我哋嘅防中,有9個10個喺入面等界外球或者角球。」

「我能夠去評價佢哋。不過我認為佢哋呢種情況下去進攻,可以創造到足夠嘅機會去入好多波。」

「我嘅信念係,防守嘅最好方法係離自己龍門有咁遠得咁遠。好多人對呢樣嘢有完全唔同嘅睇法,所以足球真係好美妙。當個波接近我哋龍門嘅時候,我哋好危險,正如喺比賽最後時刻,個波就一路喺我哋半場,但當佢哋縮後防守嗰陣,我哋就比較易踢。」


哥帥又表示,雖然今場只係贏一球,但對於球隊能夠拎到18連勝感到高興:

「呢18場波入面,我哋面對過各種對手,有人用高位壓迫、低位壓迫、防守反擊、死球戰術,或者好似熱刺咁同我哋對攻。」

「我哋每一場都可以擊敗佢哋。足球嘅美妙之處,就係每一隊波每一個領隊都可以用任何方法去踢,有啲球隊嘗試『陰』我哋,但我哋都要打低佢,直到目前為止我哋都做得到。我哋總係搵到贏波嘅方法。」


賓尼迪斯就認為球隊對今場部署執行得好好,只係對於失波感到可惜,而球隊喺上半場拎到波嗰陣表現得唔夠好,令場面更加被動,但去到比賽最後20分鐘,紐卡素用高位壓迫拎返主導權,表現得唔錯。

Source: Sky SportsDaily Mail

如果喜歡我們的文章,請即分享到︰

留言


請按此登錄後留言。未成為會員? 立即註冊
  • Ming Yen Hon 於 29/12/2017 評論 NO. 1

    大家唔好怪佢la
    佢打緊Fifa咋嘛
    成隊波D人民買過曬

快捷鍵:←
快捷鍵:→