普捷天奴多人爭,基昂籲阿仙奴:「萬勿錯過!」

睇足365 於 21/11/2019 發表 收藏文章
縱使熱刺今季成績不佳,執教近5年半嘅普捷天奴 (Mauricio Pochettino) 昨日離開熱刺,仍然令唔少球迷大感錯愕。普捷天奴敢於起用年輕球員,喺有限資源下仍令熱刺成為英超前列分子,更加喺一整季完全冇任何引援下,將熱刺帶入歐聯決賽,能力已經係有目共睹。因此,雖然普捷天奴今次黯然離任,佢仲受到多間球會關注,唔愁冇工開。


根據多間西班牙及德國傳媒報導,早前與尼高高華解約嘅德甲班霸拜仁慕尼黑,正準備向普捷天奴招手。《圖片報》稱,拜仁慕尼黑現時傾向繼續由費歷克 (Hansi Flick) 暫代主帥至球季結束,然後由普捷天奴於明年夏天接手,令佢有時間準備及學習德語。不過,一旦拜仁於歇冬期前戰績仍然未如理想,普捷天奴就會提早接手,而對普帥嘅最大障礙就係德語,因為消息指拜仁內部要求主帥必須熟習德語,以融入球會。

另一方面,西甲巴塞隆拿主帥華維迪同樣面臨帥位不穩嘅情況,不斷有聲音要求球會換帥。因此,有傳媒報導指巴塞亦會加入爭奪戰。不過,普捷天奴曾經執教巴塞死敵愛斯賓奴,佢亦曾經表明基於對舊球會嘅尊重,唔會執教巴塞。


至於熱刺嘅死敵阿仙奴,今季戰績同樣不堪入目,艾馬利嘅帥位可謂危在旦夕,有傳聞指佢未來三場聯賽再輸一場就會被解僱,但阿仙奴高層早前又曾經公開表示支持艾馬利留任。阿仙奴名宿基昂 (Martin Keown) 就直言,阿仙奴應該把握機會邀請普帥來投。

基昂話:「阿仙奴唔需要恐慌,但已經好接近需要恐慌嘅地步,我哋嘅成績未如理想,高層應該要認真考慮普捷天奴。

我好欣賞佢喺熱刺嘅表現,佢培養咗一班年輕球員出嚟,亦唔需要用好多錢。我覺得熱刺嘅轉會費投入唔足夠。

如果我係熱刺班主,會繼續留住普捷天奴,我認為佢值得留低。呢個係一個重大嘅解僱決定,令到球壇好多主帥人心惶惶。

我知道佢最近成績唔好,我完全知道最近嘅處境,但我會俾多次機會佢,我唔鍾意熱刺嘅處理方式。而家好多班主都留意住普捷天奴,曼聯上年就曾經諗過搵佢,我認為阿仙奴如果想更進一步的話,應該要對佢感興趣。」


Source: Sky SportsASMarca

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→