普巴大佬88分鐘疑輕傷自己走人,累球隊護級戰打少個被隊友圍

睇足365 於 08/05/2018 發表 收藏文章
畿內亞國腳費倫丁普巴(Florentin Pogba)係曼聯球星保羅普巴嘅哥哥,佢最近喺一場土超比賽中懷疑喺未有指示之下,自行決定離場,令球隊須以10人應戰,更與隊友發生衝突。


同弟弟一樣鍾意玩髮型嘅費倫丁普巴今年由法甲聖伊天,轉投土超球隊真格拿拜列治(Genclerbirligi),正處於護級旋渦。喺土超第32輪,真格拿拜列治主場迎戰中下游球隊安塔利亞,主隊喺78分鐘失波,落後0-1,若比賽以呢個比數結束的話,真格拿拜列治將會喺聯賽餘下兩場之下,落後護級安全區域5分,所以今場最後階段應該係球隊全力反撲之時。


喺88分鐘,司職中堅嘅費倫丁普巴懷疑有輕傷,喺球隊已經用盡三個換人名額之下,佢自己將個波大腳踢出界,再自行步出球場兼除低球衣,有幾名隊友可能認為佢理應仍然能夠堅持比賽,對佢嘅行為感到不滿,上前質問佢並有推撞動作,需要由職員分隔開。費倫丁普巴及後返回更衣室,據當地報章報導,衝突喺比賽後繼續於更衣室內發生。


如果球員的確受傷未能繼續比賽,即使令球隊踢少一個亦只屬無奈之舉,費倫丁普巴係咪唔可以再踢,只有佢自己知道,呢點亦應該疑中留情。不過,今次事件奇怪之處,在於一般受傷未能比賽,會係由隊醫檢查後提出,而費倫丁普巴係自行決定,當然亦有機會係佢寧願馬上離場都唔願意浪費時間,但睇一眾隊友嘅反應,似乎唔認為佢會係為咗球隊利益而咁做,而係認為佢不顧球隊而去多啲。

Source: ESPNDaily Mail

留言

會員
我要評論
請按此登錄後留言。未成為會員? 立即註冊
  • Peelala
    Peelala 於 08/05/2018 評論 NO. 1

    佢只要係地上面碌下碌下就有人埋去,使乜自己走出去受靶

  • Fan Lau
    Fan Lau 於 09/05/2018 評論 NO. 2

    燒壞腦袋

快捷鍵:←
快捷鍵:→