明言倒戈入波必慶祝 禾確特:「去愛華頓先搵返足球熱誠,馬高施華似雲加」

睇足365 於 22/09/2018 發表 收藏文章
周日晚上,阿仙奴對愛華頓,英格蘭翼鋒禾確特將會倒戈重返酋長球場,比賽臨近,佢接受咗《Sky Sports》以及《Telegraph》嘅訪問,提到自己離開阿仙奴嘅決定。


現時29歲嘅禾確特,2018年1月轉投愛華頓,雖然出身修咸頓青年軍,但年僅17歲已經加盟阿仙奴,喺雲加手下效力長達12年,阿仙奴可以話係佢嘅「第二母會」,而佢亦為阿仙奴上陣397次射入108球。對於上季中下定決心離開阿仙奴,禾確特表示係艱難嘅決定,但自己當時已對足球失去熱誠:


「我唔會講大話,當時我已經有少少覺得對足球失去熱誠。因為我有過一啲好表現,但就總係冇機會繼續上陣。為阿仙奴射入100球對我嚟講係一大成就,但最後嘅一年半係好難捱,冇辦法進入出場陣容,真係好難捱。


我想再次感受到足球帶俾我嘅快感,但我覺得已經唔會喺阿仙奴搵到。當時艾拿戴斯 (時任愛華頓領隊) 搵我,我就覺得係機會喇。我搵返享受嘅感覺,開心到冇得更開心,我帶住笑容踢波,重新愛上足球。」


禾確特又話,現任領隊馬高施華好似雲加:「佢好似雲加,鍾意打悅目嘅壓迫足球,控球在腳,節奏快速。呢度嘅訓練強度好高,不過我就係鍾意咁。」

對於重返酋長球場,禾確特話:
「上一次返嚟,係我轉會後冇幾耐,嚟得太快喇,感覺好唔真實,我覺得自己仲有一部分屬於呢度。球迷都一如以往,對我好好。


不過今次會唔同,我覺得好興奮,好想睇下我哋同佢哋比較,去到咩水平,我覺得我哋有機會。」

接受《Telegraph》訪問時,禾確特講明,入波照樣會慶祝:

「我會慶祝,我諗阿仙奴球迷會尊重。點解我唔可以為新球隊同球迷慶祝呢?佢哋遠道而來,就係要享受嗰一刻。有啲球員唔會慶祝,冇問題,不過我唔係咁樣嘅人。我想同我嘅隊友同球迷慶祝,佢哋而家係我嘅球迷嘛。」


可以睇得出,禾確特對於舊東家並冇半點唔尊重,只係佢嘅生涯已經展開新一頁,佢認為自己亦需要向愛華頓球迷負責,只要佢唔係好似艾迪巴約、雲佩斯嘅慶祝方式咁有挑釁意味,咁樣係冇問題,相信佢亦都唔會咁做。

不過,禾確特講到自己喺阿仙奴有好表現但得唔到機會,請恕不敢苟同。效力長達12年,禾確特試過以要求踢正前鋒為條件續約,表現隱形之後,又話自己應該踢翼鋒。身為翼鋒,突破能力、傳中質素同樣12年如一日毫無進步,作用極為單一,當然教練有責任,但佢亦並非無緣無故失寵。反而,雲加對佢耐性已經太多,拖拖拉拉反而害咗佢,個人認為佢起碼三、四年前就應該離隊尋求新環境衝擊。事實上,禾確特今季喺愛華頓表現不俗,聯賽上陣5場,已經貢獻2球1助攻,其中對般尼茅夫一仗,首先單人匹馬引球反擊單刀建功,及後再次形成單刀威脅造成對手犯規領紅,如此銳利度已多年不見。

Source: Sky SportsTelegraph

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 防中維 - 截擊與生存
    防中維 - 截擊與生存 於 22/09/2018 評論 NO. 1

    如果佢剷草,我成張櫈車埋去。

快捷鍵:←
快捷鍵:→