【日本 1-3 巴西】馬些路右腳炮彈式世界波太屈機

噚晚進行咗多場國際賽，其中一場比較早開波嘅就係日本對巴西嘅友誼賽。呢場友賽喺法國舉行，巴西喺上半場已經領先三球，而日本就喺下半場破蛋輸1-3，其中嘅焦點一定係馬些路嘅世界波。


喺香港時間11月10日20:00，日本同巴西喺法國進行友誼賽，日本派出長友佑都、吉田麻也、長谷部誠、大迫勇也、原口元氣等人，而巴西都粒粒皆星，有尼馬、加比爾捷西斯、韋利安、卡斯米路等壓陣。喺比賽第10分鐘，VAR影片助理球證提示主球證判罰吉田麻也在己方禁區犯規，由尼馬操刀射入12碼。去到16分鐘，巴西再次得到12碼，但尼馬嘅射門今次過唔到日本國門川島永嗣。

去到17分鐘，世界波出現！巴西角球攻勢，日本守將解圍不遠，巴西左閘馬些路衝到「行」，踏順右腳狂抽，個波好似炮彈咁直飛左上角破網，龍門呀莫講話係鞭長莫及呀，直頭睇都冇得睇。
https://i.imgur.com/zSqptCg.gif

上半場30分鐘，日本隊差少少追返一球，吉田麻也主射罰球彎過人牆，可惜爭啲運，個波射中門框左上角彈返出嚟。然後加比爾捷西斯就喺36分鐘，接應韋利安嘅靚地波傳中射成3-0完上半場。日本就去到63分鐘憑槙野智章頂入角球破蛋。

全場精華
https://streamable.com/habhk