施蒙尼合約下季尾到期,明言終有一日必回國米:「我已經講咗2000次會返國米」

睇足365 於 18/12/2018 發表 收藏文章
馬德里體育會主帥施蒙尼喺2011年12月23日接掌球隊,執教呢支球隊接近7年,呢個情況喺新一代主帥中並唔常見,例如哥迪奧拿每執教一支球隊三年左右就需要尋求新挑戰,而馬體會無論喺西甲嘅勁敵巴塞隆拿同皇家馬德里喺呢7年嚟已經換過多任主帥,可見施蒙尼屬於長情之人。


施蒙尼同馬體會之間嘅合約將會喺2019-20球季完結時結束,暫時仍未有續約消息。施蒙尼喺馬體會成績的確令人滿人,曾經贏得過一次西甲冠軍、2次歐霸冠軍及2次歐洲超級盃冠軍,以及2次打入歐聯決賽,各項賽事勝率達到61.54%,7年嚟個人取得3屆西甲年度最佳教練及1次歐洲年度最佳教練。不過今時今日,好多新派教頭已經唔會好似費格遜、雲加咁長年執教一支球隊,唔少人都認為不時轉換新環境係令自己保持衝勁及進步嘅方法。事實上,今季開始之前,甚至上季,已經有不少關於施蒙尼被挖角嘅消息。


根據《Football Italia》報道,施蒙尼近日接受《Radio Anch'io Sport》訪問時強調自己渴望終有一日可以回歸國際米蘭執教:「我同馬體會仍然有一年合約,而且目前事情進展十分順利。我已經好清楚咁講過2000次,我將來會返國米,我只需要講,呢件事一定會喺某一日發生。
國米同拉素都帶俾我好多美好回憶,所以我都希望佢哋一切順利。同時我都希望可以繼續保持馬體會近12至13年嘅傳統,呢支球隊定義咗我嘅戰術風格」



現年48歲嘅施蒙尼,喺球員時代曾經先後效力意甲嘅國際米蘭 (1997-99) 及拉素 (1999-2003) ,亦曾兩度效力馬體會 (1994-97、2004-05),唔計加盟拉素時贏得歐洲超級盃冠軍,佢喺國米時代贏得嘅歐霸盃前身歐洲足協盃,係佢球員時代唯一嘅歐賽錦標。


Source: Football ItaliaBR

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→