施斯隆拒絕富咸開出新合約,傳曼聯熱刺均有意收歸旗下

睇足365 於 08/06/2019 發表 收藏文章
富咸年輕球員賴恩施斯隆 (Ryan Sessegnon) 年少成名,早已受到英格蘭大球會注目。雖然佢喺啱啱呢個球季隨富咸升上英超後,未有亮眼表現,但根據報導,佢仍然選擇拒絕球會開出嘅新合約,可能係希望有機會轉投一間英超球會。

根據《Sky Sports》報導,19歲嘅賴恩施斯隆已經告知球會,將唔會簽下新合約,意味著佢決意離隊他投。報導中指出,曼聯於5月已經與富咸接觸,研究收購賴恩施斯隆嘅可能性;同時,熱刺亦有意簽下賴恩施斯隆。

loading

賴恩施斯隆出身自富咸青訓,可以於左路所有位置上陣,雖然曾經被改造成左閘,但於左閘位置上表現不及左翼/左中場,今季富咸降班,表現不濟,年輕嘅賴恩施斯隆同樣表現不佳,一度被移到右路試驗效果,全季於英超上陣35場,貢獻2個入球及6個助攻,比起佢上季喺英冠攻入16球嘅表現,無疑反映佢現階段征戰要英超係為時尚早。

曼聯已經正式簽下史雲斯左翼鋒丹尼爾占士,因此除非曼聯有意安排佢喺其他位置上陣,現時再提出賴恩施斯隆嘅可能性不高。《Sky Sports》指,施斯隆希望轉會,同時留喺倫敦,加上熱刺一直對佢感到興趣,又有重用英格蘭人嘅傳統,所以施斯隆離隊的話,熱刺呼聲較高。施斯隆現時正為英格蘭U21代表隊出戰U21歐國盃。

Source: Sky Sports

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→