新舊東家命運相反,C朗賽後攬西班牙記者:「呢個擁抱送俾皇馬球迷」

睇足365 於 13/03/2019 發表 收藏文章
周中歐聯16強次回合,C朗拿度個人連中三元大演帽子戲法,帶領祖雲達斯扭轉首回合劣勢,反勝馬德里體育會,晉身8強。可以預期,假使C朗喺呢場比賽中未有順利協助球隊出線,佢將會受到極大質疑,但而家佢已經打出身價波,正如佢喺賽後講,證明咗點解祖雲達斯要用一億歐元簽下上月年滿34歲嘅佢。


C朗拿度離開皇家馬德里之後,皇馬漸走下坡,季初球迷舉牌寫上 "Who needs Ronaldo" 嘅相片,已經成為諷刺中嘅經典,畢竟皇馬事實上就係失去咗一位一個球季可以射入50球或以上嘅主力人馬,眾人要一下子填補呢片空白難度極高。


除咗習慣倚重C朗之外,皇馬正面對陣容中軸老化問題,沙治奧拉莫斯及摩迪兩大主力已經不復當年勇,卻奧斯喺場上嘅速率效率亦稍稍不如以往,過去幾個轉會窗未有積極引入接班人選之餘,更急進引入大量前場年輕球員,佢哋潛質雖高,一時間卻難當大用,主帥無法喺更衣室內平衡世代交替嘅矛盾,就如拜仁慕尼黑季初咁,容易導致戰績不穩。皇馬一星期內於主場經歷「國家打吡」兩連敗,以及歐聯爆冷被阿積士大炒,反勝為敗,無緣歐聯8強。

相反,C朗嘅新東家就成功反敗為勝,扭轉首回合輸0-2嘅劣勢,憑C朗單天保至尊以3-0擊敗「前死敵」馬體會,晉身8強。賽後,大演帽子戲法嘅C朗心情大好,喺更衣室外通道遇上西班牙電視台《El Chiringuito》嘅記者,《El Chiringuito》當時正直播呢位記者現場採訪及《AS》阿斯報主編 Tomas Roncero (著名皇馬球迷) 視像通話。


C朗經過時,上前同呢位記者擁抱,仲話:「呢個擁抱送俾《El Chiringuito》、Tomas Roncero 同所有皇馬球迷。」附上單眼一下。相信皇馬球迷見到呢一幕,心情相當複雜。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→