「新尼馬」雲尼斯奧斯好學唔學,大炒丙組隊出彩虹過人羞辱對手失敗反出醜

睇足365 於 07/12/2018 發表 收藏文章
皇家馬德里周中出戰西班牙國王盃32強次回合,主場迎戰西乙B (即第三級別) 球會美利拉 (Melilla),「銀河艦隊」坐擁首回合4-0優勢出擊,輪換陣容下仍可輕鬆取勝,以總比數10-1晉身16強。今仗對皇馬球員而嚟講,自然係快樂足球,玩下腳法都可以理解,不過首先要玩得起。


巴西新星雲尼斯奧斯 (Vinicius Jr.) 今年夏天由法林明高加盟皇家馬德里,佢擁有傳統巴西球員嘅細膩腳法,以及表現慾,年僅18歲已經吸引到皇馬以6100萬歐元將佢收歸旗下。今季,佢暫時為皇馬一隊喺各項賽事上陣7場,射入1球 (今仗射入) 、交出5助攻,以年輕球員嚟講表現合格。

呢位被傳媒稱為「新尼馬」嘅小將,就樣樣學足晒大師兄尼馬,包括喺比賽中使出 rainbow flick 彩虹過人 (另外仲有插水)。當時係比賽下半場,球隊已經領先總比數8-0,雲尼斯奧斯年少氣盛,打算喺呢個時候玩腳法愚弄只屬第三組別球隊嘅對手,呢種行為,有球迷會覺得冇問題,有球迷會覺得冇品, 一來球隊已經大勝你先嚟show off,二來對手級數有限,俾你過咗又點呢?而根據尼馬經驗,對手一般對呢種行為十分反感,就算俾你過咗一半,都一定會出腳掃低你。不過有關風度/道德/品格嘅討論,都係等佢成功咗先講好啲!

雲尼斯奧斯喺角球旗附近面對兩人夾擊,睇返當時畫面,都勉強可以話佢選擇彩虹過人唔係完全講唔通嘅,咁佢就用後腳夾起個波,點知個波就飛咗出界,人前波後,認真尷尬。下次想表演之前,都要好好練習先得。不過佢喺稍後時間為球隊射入一球,射入加盟皇馬以嚟首個一隊入球,應該可以忘記今次失誤喇。

(尼馬經常喺比賽尾段使出 rainbow flick 過人)

其實佢唔係淨係呢樣嘢學尼馬,佢已經多次被批評喺比賽中插水,暑假踢熱身賽性質嘅國冠盃對曼聯時,已經被影到喺輕微接觸之下極度浮誇咁倒地,狀甚痛苦,當時佢連半場都未過,更加唔好提只係踢緊國冠盃。另外,佢仲試過喺皇馬B隊比賽中因為插水被逐!


雲尼斯奧斯要學就應該學「細哨」咁令人心悅誠服,死敵球迷都為佢起立鼓掌。


Source: Sportbiblethe42DailyMail

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→