教豪門最緊要識做人?肥普稱考慮放尼馬參加妹妹生日會

睇足365 於 24/01/2021 發表 收藏文章
正所謂「識時務者為俊傑」,「識撈」就會「襟撈」。睇波咁多年,總會睇到一啲本來執教中型班好有口碑嘅教練,一登龍門去到大球會就搞唔掂,好快俾人踢返落嚟,由大球會去到世界級豪門,亦有呢個情況。呢種教練,你話佢戰術唔掂?多數都唔係,因為佢哋以往已經證明咗自己能力先上位。講到尾,就係未能適應豪門內部複雜嘅人際關係同權力關係。簡單講,豪門員工都多你舊球會一千幾百,有山頭主義、 “old seafood” 嘅機會大增,一班球星亦唔一定聽你枝笛。點樣快速摸熟佈部權力關係,邊個唔得罪得、邊個會幫你、邊個同邊個一夥,同時點樣同人拉近關係,而由不失威嚴,正正係生存之道,睇嚟普捷天奴對呢一方面頗有心得。


講返巴黎聖日耳門,成隊波入面睇落最難「服侍」同最需要「服侍」,好明顯係尼馬。話說尼馬身上有一個神奇「詛咒」,佢總會喺二月底三月頭受傷或者停賽,而且會喺巴西出現,參加妹妹嘅生日派對(3月11日),同埋巴西盛事里約嘉年華 (Carnaval do Rio de Janeiro,又名里約狂歡節) 。過去已經有人統計過,佢2013年離開巴西球會山度士,2014年嘅2-3月喺巴塞隆拿並冇任何異常,之後由2015年開始,佢就咁啱得咁橋喺大約嗰啲日子停賽或受傷:2015年停賽、2016年停賽、2017受傷、2018受傷、2019受傷、2020停賽。不過2020年,情況比較特殊,妹妹生日當天,尼馬罕有地為PSG上陣,並攻入一球,而尼馬喺2月29日法甲比賽兩黃一紅後,過一排聯賽就因疫情而腰斬,而歐聯比賽亦喺3月11日呢場之後暫停。


不過呢個離奇嘅巧合,一早就通曬天,所以最近有記者就問新上任嘅普捷天奴會唔會俾尼馬放假。普捷天奴就話可以考慮一下,而且暗示有機會放人:

「到時我哋睇下點啦!戰術好重要,不過管理手法係更加重要。以前我啱啱開始教波,我同自己講我唔會喺任何事上退讓。不過12年過去,我發現自己處理事情越嚟越有彈性,而且我鍾意凡事都可以商量。

今時今日,年輕一代鍾意表達自己意見,同埋被聆聽,所以商量係好緊要。夾硬嚟係冇好處,你需要討論、商量。」

loading


講就咁講,睇返賽程,PSG要喺3月10日出戰歐聯16強首回合對巴塞隆拿,如果冇傷冇病,真係可以放尼馬返巴西?小弟就唔係好信,到時睇下普捷天奴點處理,或者尼馬有咩玩法!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→