摩佬又講經:「足總盃抽籤不利,打比郡根本係英超級數,我哋要強陣出擊」

睇足365 於 05/01/2018 發表 收藏文章
英超球隊曼聯即將出戰足總盃第三圈賽事,曼聯嘅對手係英冠球隊打比郡,摩連奴認為今場波一啲都唔易踢,要以強陣出擊。

曼聯暫時喺聯賽榜上,以47分排第二位,分數上睇本身唔太差,但哥迪奧拿率領嘅同城死敵曼城實在太恐怖,22場聯賽仍未輸過,已經拎到62分,大幅拋離曼聯15分。曼聯眼見聯賽奪冠機會漸見渺茫,加上喺聯賽盃爆冷俾布里斯托城淘汰,今次喺足總盃出擊唔敢大意都絕對正路。


主帥摩連奴就話覺得今次足總盃抽籤唔係好籤:「今次抽籤對我哋嚟講唔係咁好,因為我哋要對一支『英超球隊』。」


「你睇下打比郡嗰班球員,佢哋根本唔係英冠球員,而係英超球員。我諗我曾經喺英超同佢哋大部分球員交過手。佢哋有卡臣 (Scott Carson)、居迪斯戴維斯 (Curtis Davies)、列特利 (Joe Ledley)、馬迪維達 (Matej Vydra)、侯度史東 (Tom Huddlestone),我同佢哋都交過手。」

loading


曼聯早前喺聯賽盃八強,即使派出咗伊巴謙莫域、普巴、馬迪爾、拉舒福特,都一樣被現時英冠排第4位嘅布里斯托城以2-1淘汰,今仗一定要避免重蹈覆轍。摩連奴揚言會派出強陣應戰:

「今場對打比郡我都會一樣咁做,我會派出強陣應戰,結果唔係我哋控制到,不過我一定會派出強陣,一隊嘅首選球員。」

「我會將呢場波當英超比賽咁打,門將方面就會用羅美路,因為佢都係一個頂級門將,佢值得正選上陣,而迪基亞都要休息。」

摩佬亦都透露球隊傷病名單嘅最新狀況:「盧卡古已經好返,費蘭尼亦都可以復出。卡域克已經返嚟訓練,不過唔會比賽住。華倫西亞下星期歸隊,所以今場都唔會踢。我哋嘅傷兵情況開始好轉。」


Source: FourFourTwo

如果喜歡我們的文章,請即分享到︰

留言


請按此登錄後留言。未成為會員? 立即註冊
  • kinfung 於 06/01/2018 評論 NO. 1

    柒摩贏:己隊世界級發揮擊敗一隊強隊。柒摩輸或和:己隊永遠受英足總針對,永遠都遇上強隊致己方落敗

快捷鍵:←
快捷鍵:→