插水之奧義！俾球證掂到都「中槍」倒地，影帝獲南美自由盃決賽MVP

如果喜歡睇歐洲以外賽事嘅球迷，一定唔會錯過最近上演嘅南美自由盃決賽，呢項賽事作為南美洲內球會最高榮譽，向來都係「打甩髀」，尤其南美足球文化同埋球迷嘅投入程度，都令球賽特別刺激。喺烏拉圭時間11月27日下午，烏拉圭城市蒙特維多舉行咗2021南美自由盃決賽，由彭美拉斯對法林明高，係繼上一年決賽彭美拉斯對山度士後，再一次由兩支巴西球隊對決，而彭美拉斯就再次晉身決賽。


今場南美自由盃決賽，衛冕嘅彭美拉斯早早就由維爾加（Raphael Veiga）先開紀錄，但法林明高由加比爾巴布沙（Gabriel Barbosa）呢位耳熟能詳嘅巴西前鋒於72分鐘追成平手，將比賽帶入加時。去到加時5分鐘，彭美拉斯前鋒迪華臣（Deyverson）把握曼聯借將安迪亞斯皮里拉（Andreas Pereira）嘅失誤，長驅直進單刀射成2-1再度領先。


由於只係一球上落，又已經去到加時階段，彭美拉斯都使出拖時間大法。加時最後嘅補時階段，入球功臣迪華臣眼見冠軍在望，竟然喺一次同球證嘅接觸之後立即瞓低，球證只係用手輕輕一拍佢背脊，佢就好似中槍咁，突然慘叫瞓低，仲按住腰部「典地」，球證都知佢咩事，埋去叫佢快啲起身唔好再扮。成個過程都拖到最少10秒嘅，可見為咗贏佢可以去到幾盡。



最終彭美拉斯得償所願，成為20年嚟首支可以連續兩年奪得南美自由盃嘅球隊，亦都追平咗聖保羅，成為喺南美自由盃成績並列最佳嘅巴西球隊，一共錄得3冠3亞。

除咗有大量球迷批評迪華臣插水可恥之外，亦都有好多球迷覺得迪華臣嘅演出一流，更有人欣賞佢可以為球隊嘅勝利去到咁盡。話說曾經有前輩講過，認為喺歐洲以外其實好多足球文化都係會欣賞己隊球員為求勝利不擇手段，雖然好多球員都會做一啲小動作，例如踢人抽水、拖時間、插水之類，但歐洲足球表面上都有一種要避免勝之不武嘅自覺，或者當球隊做咗某啲事而贏波時，可能有球迷會批評球隊贏得肉酸。尤其係祟尚騎士精神嘅文化，或者講究gentleman嘅英國，就更加強調踢波都要講道德。不過諗返蘇亞雷斯喺世界盃故意用手救波令球隊晉級之後，球迷嘅反應係點，就會體現到上述嘅文化差異。當時好多西方傳媒同球迷都係批評蘇亞雷斯嘅行為，但對烏拉圭嚟講佢就係國家英雄，蘇亞雷斯根據球例承擔咗紅牌及輸12碼嘅後果，只係對方射唔入12碼，予人無尤，反而係活用球例賭博成功嘅smart play。


所以，迪華臣雖然係因為佢嘅奠勝入球而唔係演技，獲選為man of the match，但喺彭美拉斯球迷心目中，佢嘅插水亦都係顯示佢對勝利嘅渴求，為球隊嘅付出，絕對加晒分！


官方比賽精華
https://www.youtube.com/watch?v=ROeSV2v1Ry0