拯救「武球王」?傳上海上港借侯克助愛斯賓奴護級

睇足365 於 30/12/2019 發表 收藏文章
西甲球隊愛斯賓奴因為簽入中國球員武磊而於中國聲名大噪,不過球隊今季於西甲表現就相當不濟,18場聯賽只取得2勝4和12負,仍然排聯賽榜尾,有可能自1992-93球季以來首次降班。武磊早前曾經明言效忠,表示即使愛斯賓奴降班,佢都會隨隊踢西乙,而非急於返國。不過,同愛斯賓奴關係密切嘅上海上港 (武磊舊球會) 似乎願意盡力幫助愛斯賓奴護級。


根據西班牙《每日體育報》報導,愛斯賓奴最近因為戰績低迷而更換主帥,希望於一月轉會窗簽入四名球員增強實力,其中包括上海上港巴西籍前鋒侯克 (Hulk) 。消息指,愛斯賓奴中國籍班主陳雁升將會利用佢嘅人際關係促成交易,務求借用侯克至季尾。

33歲嘅侯克效力中超球隊上海上港三個半球季,124場比賽中錄得68入球53助攻,據報佢現時年薪高達1700萬歐元 (周薪約33萬歐元),成為交易最大障礙。不過,中超2019球季已經完結,2020球季要到3月先展開,6月亦會遷就國際賽期而休戰,所以若上海上港外借侯克至西甲球季尾,只會暫時失去佢3個月時間。中國傳媒報導更指出,上海上港願意承擔部分薪金,真可謂半賣半送,若傳聞真確,上海上港幫助愛斯賓奴及武磊嘅用意就不言而喻。報導又指,侯克個人同意外借,但球會雙方正就薪資分配問題談判。

話說回來,侯克年紀唔輕,佢職業生涯除咗上海上港及日職球隊,就只效力過波圖及辛尼特兩間歐洲球會,但從未於歐洲五大聯賽踢波,適應上未必順利,作為愛斯賓奴護級救兵效果成疑。


Source: sport.es , football-espana , dailymail

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→