拜仁進逼!查頓辛祖一傳一射、葛斯割草式遠射,多蒙特背水戰挫利華古遜

睇足365 於 25/02/2019 發表 收藏文章
德甲多蒙特今季乘班霸拜仁慕尼黑表現不穩,搶佔聯賽榜首位置,不過「爛船都有三斤釘」嘅拜仁急起直追,隱有後上跡象,多蒙特正感受到龐大壓力。德甲第23輪賽事,先賽一場嘅拜仁慕尼黑雖然發揮不順,仍憑查維馬天尼斯於角球攻勢頭槌奠勝,以1-0險勝哈化柏林,一度喺積分榜上同未踢今輪比賽嘅多蒙特追至同分。


由於拜仁慕尼黑近11場聯賽只逢一敗,多蒙特今仗賽前被追至同分,一旦今仗輸波,就會同拜仁重回「起跑線」,更可能令拜仁將帥得到後上封王嘅巨大心理優勢。值得一提嘅係,拜仁慕尼黑近11場聯賽唯一一場敗仗,正係多蒙特今仗對手利華古遜嘅「功勞」,因此多蒙特今仗可謂背水一戰。更甚者,多蒙特今仗有主力萊斯繼續缺陣,普利錫及比斯錫亦因傷未能上陣。

利華古遜今場比賽大部分時間控球,佔有控球率67%,但多蒙特以快速反擊為主要進攻手段。上半場30分鐘,英格蘭小將查頓辛祖開出角球,多蒙特中堅薩加度搶後點近門一射入網,為多蒙特先開紀錄。不過,禾蘭特37分鐘就以一記遠射為利華古遜追成1-1。


38分鐘,多蒙特馬上還以顏色,查頓辛祖接應傳中,禁區內窩利凌空「片」入,領先2-1。

下半場,馬里奧葛斯60分鐘禁區頂射出割草式遠射,僅僅彎過門將入網,為多蒙特擴大優勢至3-1。不過多蒙特再一次因為後防唔集中而失波,喺75分鐘被「藥廠」憑死球攻勢,由莊拿芬達無人看管下追成3-2。


驚險歸驚險,多蒙特最終成功以3-2贏得呢場關鍵比賽,繼續保持三分領先拜仁。睇睇賽程,多蒙特未來賽程冇太多考驗,所以關鍵一戰將會係4月初作客拜仁慕尼黑嘅「六分波」,同時需要提防歐聯後顧。


全場精華


Source: Dortmund Twitter

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→