拜仁前鋒辛度華拿登陸中超,500萬歐元轉投天津泰達

睇足365 於 30/01/2019 發表 收藏文章
拜仁慕尼黑前鋒辛度華拿 (Sandro Wagner) 加盟以嚟一直不受重用,畢竟拜仁首選中鋒必定係利雲度夫斯基,辛度華拿表現再好都只係 Plan B ,自然萌生去意。中超球會天津泰達今日官方宣布,成功簽下辛度華拿,簽約兩年。


31歲嘅辛度華拿於拜仁慕尼黑出道,其後曾經效力雲達不萊梅、哈化柏林等球會,喺2016年夏天加盟賀芬咸之後,佢表現出色,燃起代表德國出戰2018世界盃嘅希望,佢喺2018年1月選擇毅然重投拜仁慕尼黑,雖然佢整個2017-18球季不論代表賀芬咸及拜仁慕尼黑都有不俗表現,但呢個豪賭式舉動,無疑同佢最終落選德國出戰世界盃大名單不無關係,當然主帥路維偏好無鋒陣亦係重要因素。

重投拜仁一年以嚟,辛度華拿為球隊喺聯賽上陣21場,其中只有9場正選上陣,8入球2助攻全部係上個賽季嘅事,2018-19球季更只得到1次正選機會,場均上陣不足20分鐘,聯賽顆粒無收,只曾喺德國盃射入1球。


早已傳聞辛度華拿將會喺今個轉會窗內離隊他投,更獲得中超球會邀請。今日,中超球會天津泰達官方宣布,簽下辛度華拿並簽約兩年。據報導,天津泰達花費500萬歐元轉會費將佢收歸旗下,稅後年薪達到750萬歐元。


天津泰達順利簽下華拿,原因可能係球隊主帥正係前西德國腳史泰歷克 (Ulrich Stielike) ,呢位64歲教頭曾經喺1998-2000年出任德國國家隊助教,喺2003-06年間擔任多個德國青年梯隊主教練,後來執掌科特迪瓦及南韓國家隊。史泰歷克2017年9月中途上任成為天津泰達主帥,2018球季天津泰達僅以對賽成績優勢力壓同分嘅長春亞泰成功護級。另外,天津泰達陣中嘅德國後衛巴斯迪安斯 (Felix Bastians) 亦曾喺哈化柏林與辛度華拿合作。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→