「戰神」巴迪斯圖達談拒絕皇馬原因:「我喺皇馬可能會入超過200球,但會悶死」

睇足365 於 28/02/2019 發表 收藏文章
早前有一單新聞,係講C朗拿度話自己去祖雲達斯係為咗挑戰自己,伊巴謙莫域就回應話去祖記根本唔算挑戰。講到一個「神級」球星為咗挑戰自己而拒絕皇家馬德里之類嘅世界級豪門,相信以下呢位仁兄一定有資格講,佢係「戰神」巴迪斯圖達 (Gabriel Batistuta)。


阿根廷傳奇前鋒巴迪斯圖達有幾勁相信唔需要多講,佢因為入球如麻而被稱為「巴迪高」(Batigol) ,擁有真正可以射破網嘅射門力量,係現今球員中一項幾乎已失傳嘅技藝。


球員好多時候都難以抗拒世界級豪門嘅誘惑,巴迪斯圖達生涯主要效力嘅費倫天拿同羅馬,固然亦係意大利傳統勁旅,但對比起皇家馬德里喺世界球壇嘅地位,費倫天拿同羅馬就唔算係人人夢寐以求嘅超級豪門。一直以嚟,都有唔少球員以皇家馬德里、巴塞隆拿、拜仁慕尼黑等球會為夢想,一受到邀請就不顧一切去加盟。


巴迪斯圖達近日出席一個論壇時,就承認自己效力費倫天拿時曾經拒絕皇家馬德里同曼聯,原因係佢有錦標以外嘅追求,如果加盟一啲可以輕鬆取勝嘅豪門,會感到乏味:

「我從來唔享受做一隊波嘅球星,因為只要你成為球隊嘅核心人物,就要負起更大嘅責任。

我收過好多球會嘅邀請,包括皇馬、曼聯同AC米蘭等等,但我更喜歡為費倫天拿踢波嘅寧靜日子。

如果我去咗皇馬,我可能會入超過200球,但我知道自己會覺得好悶。同樣事情都會發生喺米蘭。

雖然我喺費倫天拿從未贏得任何主要錦標,但我認為自己係一個贏家,因為我可以幫到費倫天拿同其他勁旅競爭。」


巴迪高喺「紫百合」9年間,只贏得過意乙冠軍、意大利盃同意大利超級盃冠軍,直到後期加盟羅馬先贏得意甲冠軍,佢分別為費倫天拿及羅馬射入168及30個聯賽入球,至今仍然係費倫天拿史上意甲入球最多嘅球員。

Source: Goal

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→