成也「莫停」敗也「莫停」 PSG因卓普莫亭「中堅賓」上身錯失提前封王機會

睇足365 於 08/04/2019 發表 收藏文章
季初,當見到卓普莫亭 (Eric Maxim Choupo-Moting) 加盟PSG時,筆者大感錯愕,估唔到法甲班霸土豪會收購呢位效力史篤城嘅前鋒,而且佢職業生涯可以話從未上過大枱,最多都係效力過史浩克04等幾支德甲球隊。或者PSG睇中已經30歲嘅佢,為咗一圓豪門夢,可以甘心做後備,而事實上佢今季為PSG上陣18次,平均每次只得37分鐘,仍貢獻3個入球,算係恰如其分,可惜佢喺最近一場法甲比賽中正選上陣時,就不幸成為球隊未能於今仗提前封王嘅原因之一。


最近法甲第31輪賽事,蘭斯同里爾踢成1-1平手,次席嘅里爾失分,意味著PSG只要喺同一輪比賽全取三分,就可以提前8輪封王。PSG今仗於主場面對「超級升班馬」斯特拉斯堡,卻遇上阻礙。

開賽13分鐘,卓普莫亭首先成為入球功臣,佢接應傳中搶點射成1-0。26分鐘,紐奴達哥斯達就為斯特拉斯堡追成1-1。

27分鐘,PSG嘅尼干古挑過門將,卓普莫亭只需要加一腳,甚至唔掂波,都可以令球隊再次領先,但佢選擇喺白界線上出左腳將個波控落嚟,點知個波就停喺白界線,但卓普莫亭自己就失控衝咗入網,結果被斯特拉斯堡成功解圍,卓普莫亭就做咗「中堅亭」。


斯特拉斯堡稍後更由安東尼干卡維斯遠射破網,PSG落後1-2。戰至82分鐘,PSG先由泰路基拿接應角球頂入追平2-2。

一方面,卓普莫亭今仗取得入球;另一方面,如果佢冇喺白界前幫對手「解圍」的話,PSG好可能已經全取三分,提前封王。不過唔緊要,PSG奪冠都係時間嘅問題,佢哋下一場會直接面對法甲「二哥」里爾,現時少賽一場下仍領先20分,下仗只要取得1分都可以提早奪冠。


全場精華

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→