愛之深責之切？加利佬鬧爆C朗團隊殺手

曼聯上仗作客下游分子紐卡素，喺先失一球之下，最終僅憑卡雲尼後備上陣追平，自然令球迷相當不滿，就連曾經同C朗拿度做隊友嘅加利尼維利亦都成為其中一分子，批評C朗拿度嘅表現，唔通係愛之深責之切？


不過，「加利佬」批評C朗嘅唔係佢嘅球技、狀態等等嘅技戰術問題，而係性格之類嘅問題。事實上，C朗唔止一次被批評EQ或者球品有問題，例如較早前對利物浦時對年輕球員居迪斯鍾斯作出粗野攔截，而且擺明踢人唔踢波，詳見另文《輸波踢人？ C朗被指欠球品怒踢對手，球迷：「佢以為呢個係蘇B」》，好聽啲講就係「有火」、「對勝利執著」，難聽講就係「輸唔起」。今仗C朗同樣有一下相當難睇嘅粗野動作，再次被球迷批評佢發脾氣踢人。


另一方面，亦有人認為C朗經常抱怨隊友，缺乏團隊精神。「加利佬」就認為，C朗同般奴費南迪斯都係經常有呢個情況：

「我想講嘅係身體語言。球季早段嘅時候，我已經批評過C朗對愛華頓賽後，就咁走咗入更衣室（指C朗並冇留低同領隊及隊友前往看台答謝球迷支持）。

佢今晚同樣係自己走咗入更衣室。對屈福特嗰場都一樣，當時大家都估蘇斯克查會被炒，而對諾域治嗰場又係咁。

般奴費南迪斯都係一直喺度抱怨。佢兩個都係隊中嘅大牌球員。當兩個球隊最強嘅球員，用呢程眼光去睇其他隊友，好似其他人唔夠班咁樣，對年輕球員嚟講係有毀滅性嘅。

卡雲尼就唔同。我覺得卡雲尼喺佢兩個面前唔會縮，佢會挺身而出，幫助場上嘅年輕球員，所以佢需要落場比賽。
我唔在乎你踢成點，你都要向看台嘅球迷致謝，尤其係你係世界上最好嘅球員，同埋其中一位史上最偉大嘅球員。」



大家又覺得「加利佬」講得有冇道理呢？