意大利有人唔用 恩斯治尼狀態神勇,歐聯射入世界波破僵局

睇足365 於 22/11/2017 發表 收藏文章
就算唔睇意甲都知道,拿坡里四人組恩斯治尼、梅頓斯、荷西卡利祖同咸錫喺上季已經發光發熱,特別係恩斯治尼同梅頓斯呢兩位分別只得1.63米同1.69米嘅矮仔喺前面走嚟走去,踼到穿花蝴蝶咁。雖然係咁勁,但意大利之前輸俾瑞典而冇得踼2018世界盃決賽周,主帥雲杜拿喺附加賽兩回合加埋,竟然只係俾咗恩斯治尼14分鐘!不過恩斯治尼就好生性,佢喺返到拿坡里之後,連續兩場比賽都入波,啱啱仲喺歐聯射入世界波!


恩斯治尼其實成績唔差,雖然喺世界盃外圍賽8次上陣,只係喺對「魚腩部隊」列支敦士登時錄得1入球1助攻,但佢嘅威脅同作用都唔止數字上嘅貢獻。事實上,佢喺世界盃外圍賽6次正選上陣,球隊錄得4勝1和1負,唯一輸嘅一場波係對西班牙。意大利最終喺歐洲區外圍賽嘅G組次名出線,話晒有西班牙同組,爭唔到首名都唔係特別差嘅成績。

點知去到附加賽,生死關頭,雲杜拿突然變陣,由本身踼開嘅442變成352,搞到踼開左翼鋒嘅恩斯治尼被棄用,兩場波加埋得14分鐘出場時間,生死戰嘅第二回合更加冇出過。喺第一戰之後,名宿派路已經話過,如果俾佢揀,一定會俾恩斯治尼正選。去到第二戰,又出現咗教練叫迪羅斯熱身,令迪羅斯不滿點解急需搶攻都唔出恩斯治尼嘅一幕。邊個有能力改變戰局,相信喺意大利國家隊咁多年嘅派路同迪羅斯應該清楚過唔知喺邊度彈出嚟嘅雲杜拿!


喺香港時間11月22日03:45,歐聯分組賽第5輪,拿坡里喺主場迎戰薩克達,恩斯治尼繼上一場聯賽之後,再次入波,而且仲要係世界波。

喺比賽55分鐘,當時雙方仍然係0-0,恩斯治尼喺左路引球推入中間大位,連過兩人,輕描淡寫擺橫一射,個波就彎入右上角,龍門飛到盡都摸唔到波皮。


最後,恩斯治尼呢球打破僵局,拿坡里再由施連斯基同梅頓斯各建一功,以3-0大勝。

恩斯治尼上場聯賽都有入波。

拿坡里對薩克達全場精華

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • FatHo NG Chihojacky
    FatHo NG Chihojacky 於 22/11/2017 評論 NO. 1

    唔用佢先有力幫拿坡里爭冠軍

快捷鍵:←
快捷鍵:→