得喇得喇唔使你踢!昔日天才阿費利因態度問題被史篤城趕走

睇足365 於 29/03/2018 發表 收藏文章
大家可能聽過有啲時候打工仔唔想做,可能會搏炒,但球員生涯短暫,估唔到一個本應更明白呢個道理、多次因傷患停滯不前嘅天才球員,竟然都會咁做,佢究竟做咗啲咩冇人知,但佢嘅領隊就非常嬲……


31歲嘅前荷蘭國腳阿費利 (Ibrahim Afellay) 年輕時喺PSV燕豪芬闖出名堂,其後喺2011年加盟巴塞隆拿,被視為荷蘭新一代天才球員,不過佢經歷重傷及被外借,以巴塞球員身份虛度四年光陰 (包括被外借時間) ,其間只為巴塞上陣21場。


去到2015年,阿費利加盟英超球隊史篤城,得到領隊曉士 (Mark Hughes) 賞識及上陣機會之下,一度恍如重生,但至今三個球季之間經歷不下三次膝部重傷,始終係「傷多過踢」。今季,佢只係喺聯賽上陣6場,其中只得1場超過45分鐘,上一次上陣已經係2017年12月30日,上一次進入後備名單都要數到2018年1月15日。特別嘅係,喺領隊保羅林拔 (Paul Lambert) 於一月接任之後,佢就冇再上陣。


此前一直未有聽聞阿費利有態度問題,加上一個多次重傷嘅天才球員理應更懂得珍惜機會,所以最近嘅消息令人頗感錯愕。根據《Sky Sports》及《Telegraph》報導,史篤城領隊保羅林拔近日要求阿費利遠離球會,禁止佢參加操練及比賽,直至球季結束為止。

報導表示,領隊林拔認為阿費利對球隊更衣室氣氛有負面影響,佢喺訓練中態度差勁,更對球隊訓練造成阻礙。林拔因此告知球員,唔再歡迎佢進入球隊訓練基地。


阿費利與球隊仍有一年合約在身,但報導估計雙方將會喺今夏尋求解約共識,而喺阿費利被「放逐」期間,球隊會繼續支付佢嘅30,000鎊周薪。

球隊31輪英超比賽過後,史篤城只得27分排第19位,距離第17位、少賽一場嘅韋斯咸有3分距離,餘下7場聯賽不容有失,因此林拔需要球隊上下團結一致。球會主席 Peter Coates 受訪時表示全力支持林拔嘅處理方法:「我哋有自己嘅標準,期望球員去跟隨,我哋顯然支持領隊對相關事情嘅處理。如果佢喺呢件事上面,強烈認為應該咁樣處理,我哋當然支持佢。」

Source: Sky SportsTelegraph

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→