強雄與黃金右腳真人版?球員爭正選買兇毆隊友雙腳

睇足365 於 11/11/2021 發表 收藏文章

喺《少林足球》入面,一開場就係講強雄年輕時搵人打跛年少得意嘅「黃金右腳」隻右腳,自此未逢敵手,成為雄霸球壇嘅人物。原來類似嘅手段,喺現實球壇中都會發生,當你要同隊友爭上陣機會,佢又好鬼fit喎,可以點做?唔係操fit自己,唔係轉會,而係毆佢對腳!正當你又可能以為,呢啲咁瘋狂嘅事,會唔會係喺南美洲發生呀,畢竟都聽過球證掹槍呀,黑幫殺球員呀呢啲新聞。錯!呢件事係發生喺法甲,而且係女子足球!


法國傳媒《隊報》率先報道,巴黎聖日耳門女足中場球員Aminata Diallo懷疑因為買兇襲擊隊友Kheira Hamraoui,被警方拘捕,正接受調查。消息指,Aminata Diallo於11月4日晚上,球隊聚餐之後,揸車送隊友Kheira Hamraoui返屋企,當架車到達Kheira Hamraoui家門附近時,兩名蒙面男子突然衝出,將Kheira Hamraoui拉出車外以鐵通毆打,更集中攻擊佢嘅雙腳,2分鐘後離去,Kheira Hamraoui被送院治理。

(疑兇Aminata Diallo)

警方調查後初步相信事件同Aminata Diallo有關。雖然警方未有公開受查人及受害人名稱,但PSG發表聲明,證實球員Aminata Diallo受到拘留,並強烈譴責暴力行為。

loading

原來,Aminata Diallo同Kheira Hamraoui一樣係打防中位置,而且不但喺PSG,而且法國國家隊都係有直接競爭關係,而31歲嘅Kheira Hamraoui係大師姊,已經為法國國家隊上陣36次,26歲嘅Aminata Diallo就只為國家隊上陣7次,兩人喺球會今季上陣次數相約。Kheira Hamraoui原定於隨後對皇馬嘅歐聯賽事中上演個人第100次為PSG上陣嘅比賽,佢受傷留醫之後,Aminata Diallo取而代之,正選上陣。

(受害人Kheira Hamraoui)

不幸中之大幸,Kheira Hamraoui雙腳並冇受到重傷,唔會影響佢嘅職業生涯,只需要喺醫院縫針及休息一段時間。由於事件敗露,而球會亦出聲明譴責,相信Aminata Diallo好大機會受到法律制裁,而且再冇辦法喺球壇立足,試問吓仲有冇人敢同佢做隊友?
loading

留言


請按此登錄後留言。未成為會員? 立即註冊
    快捷鍵:←
    快捷鍵:→