前阿仙奴球星希比 (Alexander Hleb) 係白羅斯*名宿，早前剛宣布掛靴嘅佢，近日接受訪問時談及國內應對疫情嘅情況，更不忘「推銷」本國聯賽。 (*註: 慣稱白俄羅斯的 Republic of Belarus ，於2018年已將官方中文譯名更改為白羅斯，希望華人及中文使用者不再將其國與俄羅斯混淆，雖然約定俗成，但姑且尊重該國與俄國區分的意願，而Belarus一詞原意就是「白色的羅斯人」。見《白羅斯共和國「正名」：我們不是俄國的一部分，我們不叫白俄羅斯！》)
現年38歲嘅希比，去年離開職業球員生涯最後一站伊斯洛治 (FC Isloch Minsk Raion，白超球隊) ，至今月正式宣布掛靴。近日，佢接受傳媒訪問，表示白羅斯國內抗疫意識仍然唔高，當地聯賽亦未有暫停，但認為歐洲各大聯賽、歐聯、歐霸暫停係明智之舉：
「疫情令到歐聯同埋歐霸都要暫停，呢個係好事嚟嘅，因為遇到呢個情況，當局就要想辦法去制止病毒傳播，歐洲足協今次做得啱。
不過喺白羅斯，就好似冇人在意，實在難以置信。可能一兩個星期後，我哋都要停，或者我哋嘅總統想睇下事態發展如何先決定。每人都知道意大利同西班牙發生咩事，情況真係唔好，但喺我哋國家，政府官員認為情況唔係新聞報導得咁惡劣，而且有好多年輕人同學生都係咁諗。我自己就同埋家人一齊留喺屋企，但當我出街時就見到街道同餐廳都仍然好繁忙。」
希比仲向球迷及球星「推銷」白羅斯聯賽：
「而家全世界都要睇我哋白羅斯聯賽啦，大家都應該搵我哋聯賽嚟睇下。
當美國冰球聯盟NHL休季嗰陣，好多冰球員都會去俄羅斯打波。或者美斯同C朗拿度都可以諗下，嚟我哋白羅斯踢波，話曬呢度係全歐洲唯一仲繼續有波踢嘅地方。到時我哋就開心喇！」
由於近日歐洲疫情嚴峻，所有主要賽事已經暫停，只有白羅斯聯賽繼續進行。喺世界各地，絕大部分主要聯賽同樣已經暫停，只餘才部分亞洲小國及非洲國家如常作賽。最近連澳職都宣布休戰，令香港合法博彩賽事出現歷史性嘅一片空白。
Source: Talksport
請按此登錄後留言。未成為會員? 立即註冊