巴塞等錢使可以點做?搵尼馬!巴塞再告尼馬足證內部問題

睇足365 於 12/11/2020 發表 收藏文章
好多球迷都記得,西甲球星經常都會被指逃稅,然後被政府起訴,最後可能要交返巨額罰款,坊間一直有都市傳聞,認為係當地稅項複雜,所以當政府等錢使時,就會搵名氣大嘅人「開刀」,好大機會搵到「漏網之魚」。小弟完全唔熟悉當地財務情況,亦都冇意完全相信個呢個傳聞,只係想講巴塞隆拿嘅新聞,令我諗起呢個傳聞。


巴塞隆拿上季尾慘敗於拜仁慕尼黑腳下之後,眾所周知球會將會陷入一段重建期,而事實上問題早於大敗之前已寫下伏筆,大敗一場只不過係將問題完完全全浮上水面。巴塞嘅問題包括陣容老化,以及連續多年喺轉會市場操作失敗,而兩者其實最終都會講到去錢嘅問題。陣容老化方面,巴塞一直沿用多名已30幾歲、成名已久、明顯表現下滑嘅球員,問題係佢哋嘅高薪好可能高於佢哋嘅貢獻,所以球會一方面要盡量清出薪酬空間,一方面要喺市場上搵人取代佢哋,結果就要花錢(除非青訓系統十分強勁,但巴塞近年都係出到一個法迪,其他位置一樣要買人)。如果唔係基於呢個邏輯,相信巴塞冇可能喺今季前將蘇亞雷斯賣到馬體會,因為今次巴塞希望將佢清走嘅欲望,大過唔想賣人去國內競爭對手嘅顧慮。同時,呢種老將當然冇可能再賣到幾千萬,雖然清得走就可以慳一筆人工,但球會要買人都係要搵一筆錢出嚟。另一方面,轉會市場操作失敗,亦即係買返嚟嘅人表現不似預期,而且亦好難以成本價出售,意味著球會做咗蝕本生意。如果要再買人「補鑊」,就係百上加斤。

所以巴塞其實都係想開源節流,而佢哋最近採用嘅其中一個方法就追數,目標係舊將尼馬!

loading


根據西班牙《世界報》報道,巴塞隆拿球會最近正與前隊員尼馬進行訴頌,目標係追討一筆大約1000萬歐元嘅薪金。報道指,巴塞認為球會曾經喺尼馬加盟嘅頭兩個球季,向佢支付咗總共多出約1000萬歐元嘅薪金,原因係稅款計算出錯。因為好多球會向球員支薪都係計稅後薪金,所以球會出糧時會喺金額加上球員用嚟交稅嘅金額(即稅前薪金)。根據巴塞講法,由於計算稅款出錯,所以向尼馬支付嘅稅前薪金就會多咗。另外,報道又指出,稅務部門通知巴塞,如果球會未能收回1000萬歐元,就會將呢1000萬歐元視為球會向尼馬作出資產送贈,喺稅務上面會有所不同(呢方面筆者就唔清楚,估計咁巨額嘅送贈係會令巴塞需要交重稅)。

loading


假設巴塞真係計錯數,咁就證明球會真係管理不善,咁大筆數都可以錯,冇人double check得到,但又點解淨係計錯尼馬嗰筆呢?會唔會其他人都有計錯,但因為尼馬已經走咗同埋個人形象冇咁好,就搵佢開刀呢?另外,自己俾錯錢,隔咗咁耐先嚟講,唔知追得返嘅機會有幾多呢?而巴塞近年對待球員及舊將嘅方式亦都頗有爭議,今次係巴塞一方自己犯錯,冇理由期望球員會自己計算得清楚,事隔多年,尼馬大可以話Sorry嗰筆錢已經使曬,嘔唔返出嚟喎,難道你自己犯錯唔需要付出代價?

事實上,巴塞同尼馬已經唔係第一次打官司。尼馬曾表示巴塞拖欠獎金約2600萬歐元,並入稟追討;巴塞就反過來向法院提出要求尼馬歸還850萬歐元獎金,最終巴塞勝訴並獲得850萬歐元,今次巴塞會否「食過返尋味」?另外,曾經有傳巴塞可能會邀請尼馬回巢,近日程程跡象,包括訴頌、巴塞內部矛盾、財政狀況等都已經說明呢個機會越來越低,而《阿斯報》就指尼馬已決定同PSG續約。

loading

留言


請按此登錄後留言。未成為會員? 立即註冊
    快捷鍵:←
    快捷鍵:→