西班牙傳媒早前傳出一則消息，指出巴塞隆拿球王美斯有權喺今季尾以自由身離隊，引起激烈討論，畢竟巴塞喺佢合約上附上一項價值7億歐元解約金，意味著如有其他球會要向巴塞求購美斯的話，付出金額必定係天文數字，但如果傳聞屬實的話，只要你成功說服呢位球王，原來呢個金額隨時可以變成0……吊詭嘅係，如果你未能說服美斯簽約，空有7億歐元又有何用？
巴塞隆拿球會主席 Josep Maria Bartomeu 最近喺巴塞官方網站訪問中，透露美斯的確有權以自由身離隊：
「美斯現時與球會合約至2020-21球季尾，但佢有權利喺進入最後一季前選擇離開巴塞。
呢個情況同沙維、佩奧爾及恩尼斯達嘅最後一份球員合同一樣。呢啲都係值得擁有呢份自由嘅球員，而且我哋從來都唔需要擔心，佢哋對巴塞絕對忠誠。
當然，我哋想美斯留到2021年同埋之後都繼續留隊。我哋一啲都唔擔心。」
原來呢項條款係傳奇球員先有資格擁有，但佢哋全部都係巴塞青年軍出身兼當時一直效力巴塞，難怪巴塞會方咁有信心。美斯現時32歲，但佢上季各項賽事上陣50場，攻入51球，巴塞會繼續倚賴佢嘅能，而佢似乎仍會繼續留喺西甲爭取頂級榮譽，未去到沙維、恩尼斯達去其他聯賽尋求另類挑戰嘅階段，所以呢個自由離隊選項睇怕都會報廢。
Source: BarcaTV、90min
請按此登錄後留言。未成為會員? 立即註冊