巴塞中堅爭議肘擊紅牌致失分 「受害者」基羅納中場幫口:「仲以為係我犯規」

睇足365 於 24/09/2018 發表 收藏文章
周日西甲賽事,巴塞隆拿主場面對同樣嚟自加泰隆尼亞地區嘅基羅納,雖然由美斯先開紀錄,但上半場有中堅基文迪朗格勒 (Clément Lenglet) 領紅被逐,導致十人應戰下被基羅納前鋒史杜安尼連入兩球,最後僅憑碧基扳平,踢成2-2取回一分。比賽中,關鍵紅牌引起爭議,連「受害者」都出言相助,大家不妨一齊睇清楚事發經過。


比賽35分鐘,巴塞後衛基文迪朗格勒與基羅納中場皮利龐斯 (Pere Pons) 爭球碰撞,雙雙倒地,球證翻睇 VAR 片段,認為基文迪朗格勒左手肘擊皮利龐斯,直接出示紅牌將前者趕出場。


事後,巴塞嘅布斯基斯、維達爾,以及主帥華維迪一致批評 VAR 決定,認為呢個決定對賽果有決定性影響,華維迪更表示,基文迪朗格勒先係受害者。

奇就奇在,事件中被球證認為係「受害者」嘅基羅納中場皮利龐斯,坦言起初以為係自己犯規:

「冇錯,我的確係『食到一踭』,但當我起返身嘅時候,我走咗去同朗格勒 say sorry ,仲同佢握手,因為一開始我以為係我犯規。」

皮利龐斯更幫朗格勒辯護:

「呢件事冇人應該負責,結果由第三方,即係VAR去判斷,其實我根本冇留意到嗰下係批踭。」


不過睇返VAR片段,朗格勒手踭嘅去勢係有啲唔自然地斜揮向上,唔理球證半身係想吹邊個犯規,只要喺 VAR 睇到呢個畫面,朗格勒都係蝕底,難怪網上有球迷提出當年施蒙尼向碧咸犯規,但碧咸因為使出「虎尾腳」而被逐嘅例子,說明「犯規先還犯規先,紅牌還紅牌」嘅道理,所以今次爭拗點已經唔係皮利龐斯有冇犯規在先,而係朗格勒手踭動作喺當時環境下係咪出於自然 (例如會唔會因為皮利龐斯對佢犯規令佢失平衡而揮高手踭等等)。


Source: sport-englishSky SportsBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 輝少
    輝少 於 25/09/2018 評論 NO. 1

    明顯係要紅牌啦 咁都拗

快捷鍵:←
快捷鍵:→