富咸災難式防守場均失2.5球,雲帥頭號目標鎖定加利卡希爾

睇足365 於 15/12/2018 發表 收藏文章
英超升班馬富咸喺夏天轉會市場上大灑金錢,似乎可以有一番大作為,但其實已犯下球會經營大忌,一口氣買入太多新球員,極大機會產生反效果,結果佢哋暫時16輪聯賽只取得兩勝,暫排榜末。相反另一支富貴升班馬狼隊雖然支出多但並冇盲目收購一大堆球員,現時高據第10位,就連補強不多嘅卡迪夫城亦排聯賽第14位。


富咸16輪聯賽只得到9個聯賽積分,以英超傳統40分護級安全線嚟講,佢哋喺餘下22場比賽中要取得31分,雖然未至於奇蹟,但難度不可謂不高,因此佢哋早前終於果斷解僱祖簡奴域,改為聘用有「補窩匠」之稱嘅神奇領隊雲尼亞里,希望可以扭轉乾坤。


現時富咸最需要改善嘅地方,係堪稱災難嘅防守,佢哋16場失40球,場均失球達到2.5球,「拋離」所有英超球隊,反而入球方面場均可以攻入1球,唔算太差。因此,《Sky Sports》得到消息,相信雲尼亞里已經鎖定車路士中堅加利卡希爾為一月轉會窗重開時首要轉會目標,但未知佢將會提出以租借或買斷形式提出交易。


32歲嘅英格蘭中堅加利卡希爾今季已經被車路士新帥沙利棄用,佢將會喺球季後合約期滿,今季只為車路士於聯賽上陣1次,其餘賽事出場6次,除咗年紀漸長能力下滑之外,沙利亦明言加利卡希爾傳統中堅嘅踢法己不適合現時車路士。只要富咸提出合理報價,相信車路士絕對願意放行,同時富咸與車路士同屬西倫敦球會,亦會係加利卡希爾嘅首選。另外,韋斯咸及修咸頓亦盛傳有意爭奪卡希爾。


Source: Sky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 無名英雄
    無名英雄 於 15/12/2018 評論 NO. 1

    搵卡希爾真係盞搞
    場均想上3?

快捷鍵:←
快捷鍵:→