安察洛堤再登銀河艦隊,最近曾稱不會離開拖肥

睇足365 於 02/06/2021 發表 收藏文章
皇家馬德里官方宣布,意大利名帥安察洛堤接替近日請辭嘅施丹,出任球隊主教練。消息指安察洛堤與皇馬簽約3年,而佢亦同離任嘅施丹一樣係第二次成為皇馬主帥。

loading

安察洛堤執教愛華頓大約一年半,為英超球壇及愛華頓帶來驚喜,不過亦經歷過低潮,特別係今季於主場戰績差勁,全季只取得6場主場勝仗,最終只能以第10名完成球季,而佢當初執掌愛華頓嘅目標顯然係要帶領球隊衝破樽頸,爭取歐洲賽席位,所以成績其實尚未達標。不過,喺球季結束時,安察洛堤面對記者提問,似乎仍然希望繼績帶領愛華頓完成呢項挑戰,當時傳出皇馬有意再次邀請佢執教,佢嘅回答係:「同皇馬拉上關係,對我嘅講係嘉許,不過呢個消息唔係真嘅。我留喺呢度真係好開心。當然,我哋遇到難關,但我喺愛華頓感覺良好,我嘅目標係帶領愛華頓一年比一年進步。」

不過,Sky Sports消息指,其實安察洛堤超碼喺上星期已經向球會表明去意,當時愛華頓管理層同安察洛堤開會,表示支持佢就下季展開計劃,但安察洛堤喺會上已表示希望離開。安察洛堤當初與愛華頓簽約4年半,亦即係而家仲有3年合約剩低,不過皇馬會長佩雷斯親自邀請安察洛堤回歸,當然皇馬亦「豪得起」,直接賠錢俾愛華頓撬人。安察洛堤發表聲明感謝愛華頓會方、球員及球迷,佢表示皇馬一直喺佢心目中佔一席位,所以決定接受再次執教皇馬嘅挑戰。

loading

loading


安察洛堤於2013至2015年執教皇馬,帶領球隊取得2013-14歐聯冠軍、2013-14西班牙國王盃冠軍、歐洲超級盃及世界冠軍球會盃共4項錦標,不過未曾奪得西甲,於2015年四大皆空後被解僱。今次安察洛堤再次執教皇馬,將會迎來巨大挑戰,因為球隊或者會面臨大規模重整,又或者話需要重建,例如隊長拉莫斯可能會離隊,而施丹離任時表示係因為感到已經得唔到所需要嘅信任,安察洛堤可唔可以發揮佢活用任何班底嘅看家本領?真係拭目以待!

loading


Source: Sky Sports

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→